محمد تسکین
بانہال // جمعرات کی صبح سب ڈویژن بانہال کی تحصیل کھڑی کے اوپری علاقے میں قریب چار بجےبادل پھٹنے اور آسمانی بجلی گرنے کی وجہ سے ایک مقامی زمیندار کی پانچ بھیڑیں ہلاک ہوگئی ہیں جبکہ رام بن میتراہ میں چندروگ کی بستی میں بجلی کے کھمبے میں کرنٹ کی وجہ سے ایک گائے ہلاک ہوگئی ۔تحصیل کھڑی سے موصولہ اطلاعات میں بتایا گیاکہ جمعرات کی علی الصبح قریب چار بجے ترگام کے گڈ بیر بہک میں بارشوں کے دوران زوردار آواز کے ساتھ آسمانی بجلی گر گئی اور وہاں موجود محمد یوسف گوجر ولد غلام حسین گوجر ساکنہ آکھرن کھڑی کی پانچ بھیڑیں موقع پر ہی ہلاک ہوگئیں۔ اِدھر رام بن کے میتراہ علاقے میں بیٹری چشمہ کے علاقے کو جانے والی 11 کلوواٹ کی ٹرانسمیشن کے لوہے ہے کھمبے میں ٹیلیویژن ریلے ٹاور چندروگ کے پاس بجلی کے کرنٹ کی وجہ سے ایک دودھ دینے والی اعلیٰ نسل کی جرسی گائے کرنٹ لگنے کی وجہ سے ہلاک ہوگئی ہے۔ یہ گائے مشتاق احمد نظامی ساکنہ چندروگ رام بن کی تھی اور یہ واقع صبح قریب گیارہ بجے پیش آیا ۔ مقامی لوگوں نے بتایا کہ علاقے بارشیں ہورہی تھیں جب یہ واقع رونما ہوا ۔لوگوں نے دونوں واقعات میں معاوضہ کی ادائیگی کا مطالبہ کیا ہے ۔
