سرینگر //جموں و کشمیر میں کورونا وائرس متاثرین کی تعداد میں اضافہ کا سلسلہ بدستور جاری ہے۔ 51دنوں کے بعد پہلی مرتبہ متاثرین کی مجموعی تعداد 180 سے زیادہ ہوگئی ہے۔ گذشتہ 24 گھنٹوں کے دوران جموں و کشمیر میں کورونا وائرس کی تشخیص کیلئے 54ہزار 750 ٹیسٹ کئے گئے جن میں 5 مسافروں سمیت 181افراد کی رپورٹیں مثبت آئی ہیں۔اس سے قبل 22ستمبر کو جموں و کشمیر میں 204افراد وائرس سے متاثر ہوئے تھے۔ متاثرین کی مجموعی تعداد 3لاکھ 34ہزار کا ہندسہ پار کرکے 3لاکھ 34ہزار 6ہوگئی ہے۔ اس دوران گذشتہ24گھنٹوں کے دوران کسی کی موت نہیں ہوئی ہے۔ متوفین کی مجموعی تعداد 4448بنی ہوئی ہے۔ جموں و کشمیر میں کورونا وائرس سے روزانہ متاثر ہونے والے افراد کی تعداد میں اضافہ جاری ہے اور پچھلے24گھنٹوں کے دوران 181افراد کی رپورٹیں مثبت آئی ہیں۔ مثبت قرار دئے گئے 181افراد میں جموں میں 26 جبکہ کشمیر میں 155افراد متاثر ہوئے ہیں۔ وادی کے 155متاثرین میں 3بیرون ریاستوں سے سفر کرکے کشمیر پہنچے جبکہ دیگر 152افراد مقامی سطح پر رابطے میں آنے کی وجہ سے متاثر ہوئے ہیں۔ کشمیر میں متاثر ہونے والے 155افراد میں سرینگر میں سب سے زیادہ 44، بارہمولہ میں 43،بڈگام میں 23،پلوامہ میں 2، کولگام میں 17، اننت ناگ میں 6، بانڈی پورہ میں 6، گاندربل میں 11، کولگام میں 3جبکہ شوپیان میں کسی کی رپورٹ مثبت نہیں آئی ہے۔ کشمیر میں متاثرین کی مجموعی تعداد 2لاکھ 9ہزار 420تک پہنچ گئی ہے۔ کشمیر میں مسلسل چوتھے دن بھی وائرس سے کسی کی موت نہیں ہوئی ہے۔ متوفین کی مجموعی تعداد 2270بنی ہوئی ہے۔ جموں صوبے کے راجوری ، کٹھوعہ ، کشتواڑاوررام بن میں کسی کی رپورٹ مثبت نہیں آئی ہے جبکہ جموں کے دیگر 6اضلاع میں 26افرادکی رپورٹیں مثبت آئی ہیں۔ جموں صوبے کے 26متاثرین میں 2بیرون ریاستوں سے سفر کرکے جموں پہنچے جبکہ دیگر 24افراد مقامی سطح پر رابطے میں آنے کی وجہ سے متاثر ہوئے ہیں۔ جموں صوبے میں متاثر ہونے والے 26افراد میں جموں میں 16، ادھمپور میں 3، ڈوڈہ میں 3، سانبہ میں 1، پونچھ میں 1 جبکہ ریاسی میں 2متاثر ہوئے ہیں۔جموں میں متاثرین کی مجموعی تعداد 1لاکھ 24ہزار 586تک پہنچ گئی ہے۔ اس دوران جموں صوبے میں بھی وائرس سے کسی کی موت نہیں ہوئی ہے۔ جموں صوبے میں متوفین کی مجموعی تعداد 2178تک پہنچ گئی ہے۔
کورونا میں اچھال بدستور،51دن بعد 180 سے زائدمثبت
