سرینگر// مختلف مزاحتمی جماعتوں کے لیڈروں اورکارکنوں پر مشتمل وفود نے کل گاندربل،پلوامہ اورشوپیان کا دورہ کیا اور وہاں حال ہی میں جاں بحق ہوئے جنگجوئوں اور شہریوں کے لواحقین کے ساتھ اظہار یکجہتی کیا۔لبریشن فرنٹ کے ایک اعلیٰ سطحی وفد نے کل پلوامہ، شوپیان اور گاندربل کے کئی علاقوں کا دورہ کیا اور وہاں حال ہی میں جاں بحق کئے گئے نوجوانوں کے لواحقین کے ساتھ اظہار یکجہتی کیا۔ وفد نے رہمو، دربگام اور آری ہل پلوامہ،ہف شرمال شوپیان اور ژند گاندربل میں ہورہی مجالس تعزیت میں شرکت کی۔ اس موقع پر فرنٹ قائدین نے کہا کہ نوجوان ایک عظیم و مقدس مشن کیلئے اپنی جانیں قربان کررہے ہیں اور بایں ہمہ قوم و ملت کشمیر ان عظیم نفوس کی مرہون منت اور مقروض ہے۔اراکین وفد نے لواحقین کی ڈھارس بندھانے کے ساتھ ساتھ ان کے ساتھ اظہار یکجہتی کیا۔ حریت(ع)کے رہنما مختار احمد وازہ نے سجاد احمد راتھر ولد منظور احمد راتھر سکونت ڈورو اسلام آباد کے گھر جاکر لواحقین کے ساتھ حریت قیادت کی جانب سے تعزیت و تسلیت کا اظہار کیا۔ مسلم ڈیموکریٹک لیگ کے صدر حکیم عبدالرشیداوراسلامک پولیٹکل پارٹی کے چیئرمین محمد یوسف نقاش نے گاندربل جاکر پروفیسر ڈاکٹر محمد رفیق کے گھر میں منعقدہ دُعائیہ مجلس سے خطاب کرتے ہوئے کہا کہ مسئلہ کشمیر کو کشمیری عوام کی خواہشات کے مطابق حل نہ کرکے اور کشمیریوں کو طاقت اور تشدد کے بل پر دباتے ہوئے پڑھے لکھے نوجوانوںکو پُشت بہ دیوار کرتے ہوئے ہماری نسل کشی کے اپنے منصوبوں پر عمل پیرا ہے۔ سالویشن مومنٹ چئیرمین بٹ کی ہدایت پروفود نے بشوپیان، سرینگر، گانددبل میں حالیہ واقعات میںجاں بحق ہوئے نوجوانوں کے لواحقین سے تعزیت پرسی اور یکجہتی کا اظہار کیا اور ان کے اہل خانہ کو صبر جمیل عطا کرنے کے لئے اللہ تعالٰی سے دعا کی ہے۔ مسلم لیگ کا ایک اعلیٰ سطحی وفد زیر قیادت فیاض سبطین گاندربل ، ملک آنگن فتحہ کدل گیا اور پروفیسر ڈاکٹر رفیع احمد ، فیاض احمد حمال اور عابد احمدکے اہل خانہ کو تعزیت پیش کی اور ان سے یکجہتی کا اظہار کیا۔اس موقع پر فیاض سبطین نے خراج عقیدت ادا کرتے ہوئے کہا ایک جانب اعلیٰ تعلیم یافتہ اور دانشورپروفیسر رفیع جیسے عظیم المرتبت لوگ جزبہ مزاحمت کااظہار کرتے ہوئے ایک مقدس مشن کی آبیاری کررہے ہیں اور دوسری طرف زندگی کے دیگر شعبہ جات سے وابستہ لوگ بھی تحریک آزادی کے تئیں جس والہانہ عقیدت کا اظہار کررہے ہیں وہ اس بات کا ثبوت ہے کہ لاکھ ظلم و ستم کے ہتھکنڈے آزمانے کے باوجود فتح حق کی ہوگی۔مسلم کانفرنس چیرمین شبیر احمد ڈار نے گاندربل جاکرپروفیسر محمد رفیع کے گھر والوں کے ساتھ اظہار یک جہتی کیااور وہاں موجود لوگوں سے خطاب کرتے ہوئے کہا کہ شوپیان میں جس طرح سے بھارتی فوج نے معصوموں کا لہو بہایا،وہ انسانی تاریج کے بدترین واقعات میں سے ایک ہے۔ینگ مینز لیگ چیرمین امتیاز احمد ریشی نے ڈاکٹر محمد رفیع کے گھر جاکر انکے اہل خانہ کے ساتھ تعزیت کرنے گیا۔ادھرپیروان ولایت نے حالیہ معرکوں میں جانبحق ہونے والے نوجوانوں کو خراج پیش کیا ہے ۔ترجمان نے کہا کہ شوپیان میں ایک ہی دن میں درجنوں کشمیری نوجوانوں کو ابدی نیند سلادینا بربریت کی انتہا اوراس دہشتگردی کو روکنے کیلئے عالمی برادری کو اپنا کردار ادا کرنا چاہیے۔
کشمیری قوم نوجوانوںکی مرہون منت ،قربانیاں رنگ لائیں گی
