کشتواڑ انتظامیہ نے خود روزگار میلوں کے انعقاد کے لیے کمر کس لی

کشتواڑ،//ضلع انتظامیہ کشتواڑ نچلی سطح پر خود روزگار اسکیموں کے بارے میں بیداری پھیلانے کے لیے ضلع میں بلاک وار خودروزگارمیلے منعقد کرنے کے لیے بالکل تیار ہے۔اس سلسلے میں ڈپٹی کمشنر اشوک شرما نے مشن یوتھ کی ضلعی سطح کی ٹاسک فورس کی میٹنگ کی صدارت کی۔ڈی سی کوبتایا گیا کہ مشن یوتھ کے دائرہ کار میں بہت ساری سرگرمیاں شامل ہیں جن میں تیجسوینی، ممکن، اے وی ایس اے آر، رائز ٹوگیدر، ساہتا، ٹورسٹ ولیج نیٹ ورک کی ترقی وغیرہ جیسی سکیموں کے ذریعے خود روزگار کو فروغ دینا شامل ہے۔بے روزگار دیہی نوجوانوں کی شناخت کے حوالے سے موضوع پر بات چیت کی گئی تاکہ انہیں ان کی دلچسپی کے شعبے میں خود روزگار کے مواقع فراہم کیے جاسکیں۔ اجلاس میں بتایا گیا کہ ضلع میں نوجوانوں کا ڈیٹا بیس تیار کیا جانا ہے جس کے لیے میلوں کا شیڈول جلد مطلع کر دیا جائے گا۔میٹنگ کے دوران چیئر نے مشن یوتھ کے خود روزگار اقدامات کے نفاذ کا بھی جائزہ لیا اور ضلع کے بے روزگار نوجوانوں تک اس کے فوائد پہنچانے کے لیے روڈ میپ کو حتمی شکل دی۔انہیں بتایا گیا کہ ضلع انتظامیہ نے ہر پنچایت میں 5 نوجوانوں کی نشاندہی کی ہے تاکہ انہیں مشن یوتھ کے تحت مختص منافع بخش سرگرمیوں میں شامل کیا جا سکے۔ڈپٹی کمشنر نے ڈسٹرکٹ ایمپلائمنٹ اینڈ کونسلنگ سنٹر کو ہدایت کی کہ وہ نامزد پنچایت سرپرستوں کے ساتھ مل کر کام کریں تاکہ ہر پنچایت میں بیداری کے پروگرام منعقد کیے جائیں تاکہ تمام اہل نوجوان حکومت کی خود کفالت اسکیموں سے سیر ہو سکیں۔