عظمیٰ سپورٹس ڈیسک
نئی دہلی//بین الاقوامی کرکٹ کی 146سالہ تاریخ میں پہلا اور اپنی نوعیت کا ایک انوکھا واقعہ پیش آیا ۔ سری لنکن آل راؤنڈر اور سابق کپتان اینجلو میتھیوز کو وقت پر وکٹ پر نہ پہنچنے کے باعث ’ٹائم آؤٹ‘ کر دیا گیا۔ اینجلو میتھیوز پیر کو نئی دہلی کے ارون جیٹلی اسٹیڈیم میں بنگلہ دیش کے خلاف ورلڈ کپ 2023کے میچ کے دوران بین الاقوامی کرکٹ میں ٹائم آؤٹ ہونے والے پہلے کھلاڑی بن گئے۔ قانون کے مطابق وکٹ گرنے کے بعد نئے بیٹسمین کو تین منٹ کے اندر وکٹ پر پہنچنا ہوتا ہے لیکن اینجلو میتھیوز ایسا کرنے میں ناکام رہے جس کی وجہ سے انہیں ٹائم آؤٹ قرار دیا گیا۔ بیٹنگ کیلئے باہر نکلتے ہی میتھیوز کے ہیلمٹ کا سٹریپ ٹوٹ گیا۔ جب وہ متبادل کا انتظار کر رہے تھے، شکیب نے اپیل کی اور میتھیوز کو آؤٹ کر دیا گیا۔ ایک بار جب شکیب نے فیصلے کو برقرار رکھنے کا فیصلہ کیا تو امپائر کچھ نہیں کر سکتے تھے۔ شکیب کے سدیرا سمارا وکرما، جنہوں نے 42گیندوں پر 41رنز بنائے، کو آؤٹ کرنے کے بعد میتھیوز بیٹنگ کے لئے آئے تھے۔ ایم سی سی رول بُک کے مطابق بیٹسمین کو تین منٹ کے اندر وکٹ پر پہنچنا ہوتا ہے، اگر بیٹر ایسا کرنے میں ناکام رہے تو آنے والا بلے باز آؤٹ ہو جائے گا، ٹائم آؤٹ ہو جائے گا۔ اس سے قبل ایسا صرف فرسٹ کلاس کرکٹ میں چھ مرتبہ ہو چکا ہے اور بین الاقوامی کرکٹ میں پہلی بار ہوا ہے۔
