کرونا وائرس : شہریوں کی عمومی جانچ کرنیکا فیصلہ

سرینگر// لداخ میں کرونا وائرس کے3نئے کیس اور پورے ملک میں اس مہلک وائرس سے متاثرہ افراد کی تعداد137 جبکہ مرنے والوں کی تعداد3ہوگئی ہے۔ لداخ کے نئے مریضوں میں2کا تعلق لیہہ اور1کا تعلق کرگل سے ہے ۔ لداخ کے جن6افراد  کے ٹیسٹ مثبت پائے گئے ہیں اُن میں ایک محکمہ صحت کاملازم بھی شامل ہے جبکہ50مشتبہ مریضوں کی رپورٹ آنی باقی ہے۔لداخ میں22ہزار لوگوں کی سکریننگ عمل میں لائی گئی ہے اور130لوگوں کے نمونے حاصل کئے گئے ہیں۔ ممبئی میں ایک64سالہ شخص کی ہلاکت ہوگئی ہے جو 5مارچ کو دُبئی سے وطن لوٹا تھا۔اگر چہ مذکورہ شخص کی ٹیسٹ رپورٹ ابھی نہیں آئی ہے، مگر اس کی اہلیہ کے کروناوئرس میں مبتلاء ہونے کی تصدیق ہوگئی ہے۔اس دوران مرکزی سرکار نے یورپی یونین، ملیشیا، فلپائین اور افغانستان سمیت کئی ممالک سے آنے پر پابندی عائد کردی ہے۔ابھی تک کم و بیش 20ممالک سے فضائی سروس معطل کردی گئی ہے جن میں ایران، ترکی، چین، جنوبی کوریا، تھائی لینڈ بھی شامل ہیں۔انڈین کونسل آف میڈیکل ریسرچ کے ڈائریکٹر جنرل ڈاکٹر بلرام بھارگو نے نئی دلی میں ایک پریس بریفنگ کے دوران کہا کہ وہ ملک بھر میں اُن شہریوں کے عمومی ٹیسٹ (رینڈم ٹیسٹ) کرانے پر غور کررہے ہیں ،جو حالیہ ایام میںبھارت سے باہر بھی نہیں گئے ہیں۔انہوں نے کہا کہ اس طریقے کے ایک ہزار ٹیسٹ پچھلے دو دن کے دوران کئی مقامات پر کئے گئے ہیں لیکن کوئی بھی رپورٹ مثبت نہیں آیا۔تاہم اُن کا کہنا تھا کہ وہ اس فارمولہ پر غور کرنے جارہے ہیں جو جنوبی کوریا میں کرونا وائرس کو پھیلنے سے روکنے کیلئے اپنایا گیا۔اُن کا کہنا تھا کہ جنوبی کوریا میں  شدت کے ساتھ اجتماعی طور ٹیسٹ کرائے گئے جس کے بعد وہاں اس وائرس کو پھیلنے سے کافی حد تک روکا گیا۔آئی سی ایم آر کے ڈائریکٹر،ڈاکٹر رمن گنگا کھیدکر نے کہا کہ پرائیویٹ لیبارٹریوں کا استعمال کرنے کے بارے میں صلاح مشورہ چل رہا ہے تاکہ حکومتی سطح کی کوششوں میں پرایئویٹ سیکٹر کو بھی شامل کیا جائے ۔اُن کا کہنا تھا کہ خدشہ ہے کہ بھارت میں ایسے مریض موجود ہونگے جو غیر ملکی دورے پر نہیں گئے ہوں لیکن اُن میں کرونا وائرس میں مبتلاء ہونے کی علامات موجود ہوں مگر جن کے ٹیسٹ نہیں کئے جارہے ہیں ، ایسا اس لئے کیا جارہا ہے کیونکہ ملک کے اندر محدود وسائل دستیاب ہیں، لیکن یہ بہت ضروری ہے کہ کرونا وائرس کو قابو کرنے کیلئے ٹیسٹنگ سہولیات بڑے پیمانے پر دستیاب ہونی چاہیں۔اُن کا مزید کہنا تھا کہ مختلف ریاستوں نے اپنی ذمہ داری کا احساس کرکے کرونا وائرس کو روکنے کیلئے از خود عوامی آگہی پروگرام تشکیل دئے ہیں۔ اس ضمن میں انہوں نے کیرالہ کے وزیر اعلیٰ کی مثال پیش کرتے ہوئے ’’بریک دی چین‘‘ نامی مہم کا ذکر کیا، جس کے تحت اور باتوں کے علاوہ لوگوں کو  ہاتھ صاف کرنے کے بارے میں ضروری جانکاری فراہم کی گئی۔انہوں نے مزید کہا کہ پنجاب،ہماچل،اُروناچل پردیش اور شمال مشرقی ریاستوں نے غیر ملکی سیاحوں کے داخلے پر پابندی عائدکردی ہے جبکہ بیشتر ریاستوں نے اسی طرح کے دیگر اقدامات کو بروئے کار لایا ہے۔ادھرمرکزی سرکار نے منگل کو اس بات کا اعلان کیا کہ کرونا وائرس کے تشخیصی ٹیسٹ اب پرائیویٹ لیبارٹریوں سے بھی کرائے جاسکتے ہیں۔سرکار نے اس کیلئے60تسلیم شدہ پرائیویٹ لیبارٹریوں کی نشاندہی کرتے ہوئے اُن کو کروا ناوائرس کے تشخیصی ٹیسٹ کرنے کی اجازت فراہم کرنے کا فیصلہ لیا ہے۔ یاد رہے کہ ابھی تک ملک کے اندر کرو ناوائرس کے ٹیسٹ صرف سرکاری سطح پر ہی انجام دئے جاتے تھے اور ان مراکز کی تعداد محض52ہے۔مرکزی وزارت صحت نے کہا کہ فی الوقت بھارت میں10ہزار کے قریب روزانہ ٹیسٹ کرنے کی صلاحیت جس کو اب دوگنا کیا جارہا ہے۔ وزارت نے کہا کہ ملک کے اندرروزانہ 600نمونے لئے جاتے ہیں ،پورے ملک میں 60ہزار ٹیسٹنگ کٹس موجود ہیں اور مزید2لاکھ ایسے کٹس فراہم کرنے کے احکامات صادر کئے گئے ہیں۔متعلقہ وزارت کے مطابق ملک کے مختلف سرکاری و نجی اسپتالوں کے اندر نزلہ، زکام، کھانسی و بخار میں مبتلاء 1040مریضوں کے نمونے حاصل کئے گئے لیکن ان میںکسی بھی ٹیسٹ کی رپورٹ مثبت نہیں آئی ہے۔