کاکہ پورہ پتھرائو واقعات | 10 گرفتار، پلوامہ اور کوکر ناگ میں تلاشیاں

پلوامہ +سوپور+اننت ناگ// پلوامہ کے کاکا پورہ قصبہ میں گزشتہ روز مسلح تصادم آرائی کے دوران مقام جھڑپ پر تشدد آمیز مظاہرے کرنے کے الزام میں 10نوجوانوں کو حراست میں لیا گیا ہے۔ یہ گرفتاریاں پانپور پولیس کی جانب سے کی گئیں ہیں اور انکے خلاف کیس درج کیا گیا ہے۔پولیس بیان کے مطابق’’ پولیس سٹیشن پانپور نے ایسے 10شر پسند عناصر کی گرفتاری عمل میں لائی، جنہوں نے کاکہ پورہ میں انکوانٹر ڈیوٹی پر تعینات سیکورٹی عملے پر پتھرائو کیا‘‘۔ بیان کے مطابق’’ تاہم نزدیکی گائوں سانبورہ کے چند شر پسند عناصر نے سیکورٹی فورسز کی کارروائی مٰن رخنہ ڈالنے  کی غرض سے پتھرائو کیا اور ملک دشمن نعرے لگائے‘‘۔پولیس بیان میں کہا گیا ہے’’ شر پسند عناصر کی موقعہ پر ویڈیو عکس بندی کی گئی اور بعد میں انکی شناخت کر کے انہیں گرفتار کیا گیا‘‘۔بیان میں کہا گیا ہے کہ دیگر ملوث نوجوانوں کی گرفتاری بھی ہونے جارہی ہے۔پولیس نے کہا ہے کہ اس طرح کے واقعات کو برداشت نہیں کیا جاسکتا اور والدین کو چاہیے کہ وہ اپنے بچوں کو اس طرح کیی صورتحال سے دور رکھنے میں اپنی ذمہ داری نبھائے۔خیال رہے جمعہ کے روز کا کہ پورہ میں تصادم آرائی کے دوران تین مقامی جنگجوجاں بحق ہوئے تھے جس دوران یہاں فورسز اور نوجوانوں کے درمیان پر تشدد جھڑپیں ہوئی تھیں جن میں 7نوجوان پلیٹ جبکہ ایک خاتون گولی لگنے کی وجہ سے زخمی ہوئی تھی ۔ادھر اننت ناگ اور پلوامہ میں بڑے پیمانے پر جنگجو مخالف آپریشن کئے گئے۔ اننت ناگ ضلع کے کوکرناگ کے ہانگل گنڈ گائوں کا فوج، سی آر پی ایف اور ایس او جی کی مشترکہ ٹیموںنے محاصرے کیا اور تلاشی مہم شروع کی۔علاقے میں تمام داخلی اور خارجی راستوں پر پہرے بٹھا دئے گئے ،تاہم کسی بھی شخص کی گرفتاری عمل میں نہیں لائی گئی ۔ ادھرچار بجے کے قریب کریم آ باد پلوامہ کو بھی محاصرے میں لیا گیا اور یہاں شام دیر تک تلاشی کارروائی جاری تھی۔