عظمیٰ نیوزسروس
کٹھوعہ//ڈپٹی کمشنر کٹھوعہ راجیش شرما نے ڈی سی آفس کمپلیکس کے کانفرنس ہال میں پردھان منتری آواس یوجنا (اربن) 2.0کے تحت پیش رفت کا جائزہ لینے کے لیے ایک میٹنگ کی صدارت کی۔میٹنگ میں ایڈیشنل ضلع ترقیاتی کمشنر کٹھوعہ سریندر موہن شرما نے شرکت کی۔ دھان منتری آواس یوجنا (اربن) 2.0کے تحت مقدمات کی جسمانی اور مالی پیش رفت کا جائزہ لیتے ہوئے، ڈپٹی کمشنر نے متعلقہ افسران کو زیر التواء درخواستوں کی تصدیق اور منظوری کے عمل کو تیز کرنے کی ہدایت کی۔ انہوں نے اس بات پر زور دیا کہ تمام کیسز پر سختی سے میرٹ اور سکیم کے رہنما خطوط کے مطابق کارروائی کی جائے۔ڈی سی نے افسران کو مزید ہدایت کی کہ وہ اس بات کو یقینی بنائیں کہ ناقص درخواستوں کی فوری جانچ پڑتال اور مناسب جواز کے ساتھ مسترد کر دی جائے تاکہ حقیقی مستحقین فائدہ سے محروم نہ رہیں۔ انہوں نے نفاذ کے ہر مرحلے پر شفافیت کو برقرار رکھنے اور اہل مستفیدین کو قسطوں کی ادائیگی بروقت یقینی بنانے پر زور دیا۔ ڈی سی نے تمام ایگزیکیوٹنگ ایجنسیوں پر زور دیا کہ وہ کٹھوعہ ضلع کے شہری علاقوں میں پردھان منتری آواس یوجنا (اربن) 2.0کے تحت 100 فیصد سیچوریشن حاصل کرنے کے لیے مشن موڈ میں کام کریں۔
