چین ،ایران اور امارات میں زلزلے کے جھٹکے

ٹوکیو//جاپان کے شمال مشرقی علاقوں میں بدھ کو دیر گئے آنے والے زبردست زلزلے میں 5 افراد ہلاک اورایک سو سے زائد زخمی ہو گئے ۔فائر اینڈ ڈیزاسٹر مینجمنٹ ایجنسی کے مطابق، 7.4 شدت کے زلزلے نے میاگی اور فوکوشیما سمیت سات صوبوں کو متاثر کیا۔ مقامی وقت کے مطابق صبح 0630 بجے تک ان صوبوں میں زلزلے سے 92 افراد کے زخمی ہونے کی اطلاع ہے ۔ملک کے شمال مشرقی اور مشرقی علاقوں بالخصوص میاگی اور فوکوشیما کے علاقوں میں زلزلے کے شدید جھٹکے محسوس کیے گئے جہاں چھ سے زیادہ شدت کے جھٹکے محسوس کیے گئے ۔زلزلے کے جھٹکے مقامی وقت کے مطابق رات 1136 بجے کے قریب محسوس کیے گئے ۔میاگی اور فوکوشیما صوبوں کے ساحلی علاقوں کے لیے ایک میٹر تک سونامی کی لہر کی وارننگ جاری کی گئی اور لوگوں سے ساحل سے دور رہنے کی اپیل کی گئی۔جمعرات کی صبح زلزلے کے بعد بلٹ ٹرین کے پٹری سے اترنے کے بعد توہوکو شنکانسن بلٹ ٹرین سروس کا ایک حصہ معطل کر دیا گیا ہے ۔ایسٹ نیپون ایکسپریس وے کمپنی نے ایکسپریس وے کے کئی حصوں کو عارضی طور پر بند کر دیا ہے ، جس میں اوساکی، میاگی صوبوں میں تھوکو ایکسپریس وے اور سوما، فوکوشیما میں جوبن ایکسپریس وے شامل ہے ۔ادھرچین کے صوبہ گانسو کے ژانگئے شہر کی سنان کاؤنٹی میں جمعرات کی صبح زلزلے کے شدید جھٹکے محسوس کیے گئے ۔جس کی شدت ریختر پیمانے پر 5.1 درج کی گئی ہے ۔ادھر ایران کے جنوبی علاقوں میں 6شدت کے زلزلے کے جھٹکے محسوس کئے گئے۔تہران میں واقع زلزلہ پیما مرکز کے مطابق ہرمزگان صوبے میں 6شدت کا زلزلہ محسوس کیا گیا۔زلزلے کا مرکز سطح زمین سے 10کلومیٹرنیچے تھا۔ایرانی حکام کے مطابق زلزلے سے فی الحال کوئی جانی نقصان کی اطلاع نہیں ملی۔ادھرکل علی الصبح متحدہ عرب امارات کی مختلف ریاستوں میں زلزلہ کے جھٹکے محسوس کئے گئے ۔ اماراتی وقت کے مطابق زلزلے کے جھٹکے رات 3:19 منٹ پر آئے ۔میڈیا رپورٹس کے مطابق زلزلے سے لوگ سوتے ہوئے اُٹھ گئے ۔