پلوامہ اور شوپیان میں حملوں کے بعد | جنوبی کشمیر میں سیکورٹی بندوبست مزید سخت

سرینگر// جنوبی کشمیر کے مختلف علاقوں میں سیکورٹی بند وبست کو مزید سخت کر دیا گیا ہے اور سیکورٹی فورسز نے ناکوں پر لوگوں اور گاڑیوں کی تلاشی کا سلسلہ ایک بار پھر شروع کر دیا ہے۔ پلوامہ، ترال اور شوپیاں میں ہفتے کی شام نامعلوم بندوق برداروں نے غیر مقامی ترکھان پر فائرنگ کی جس وجہ سے وہ شدید طورپر زخمی ہوا جبکہ شوپیاں اور ترال میں سی آر پی ایف پر گرینیڈ حملے کئے گئے۔ اتوارکے روز  پلوامہ، شوپیاں اور اننت ناگ کے مختلف علاقوں میں سیکورٹی بند وبست کو مزید سخت کر دیا گیا تھا۔ اہم اور حساس مقامات پر سیکورٹی فورسز نے ناکے لگا ئے اور وہاں مشکوک نظر آنے ولی مسافر گاڑیوں، موٹر سائیکلوں، آٹو رکشا وغیرہ کو روکا جاتا تھا اور ان کی تلاشی لی جارہی تھی۔ کئی مقامات پر راہگیروں کو بھی روکا جاتا رہا ،ان کی جامہ تلاشی ور ان کے شناختی کارڈ بھی چیک کئے جاتے رہے۔کئی مقامات پر گاڑیوں میں مسافروں کو نیچے اتارا گیا۔ جنوبی کشمیر میں ملی ٹینٹ حملوں کے بعد سیکورٹی بندوبست کو مزید سخت کیا گیا ہے۔ سرگرم ملی ٹینٹوں اور اْن کے مددگاروں کے خلاف آپریشنز میں تیز ی لائی گئی ہیں۔ ملی ٹینٹ معاونین کو بڑے پیمانے پر تلاش کیا جارہا ہے تاکہ جنگجووں کے منصوبوں کو پوری طرح سے ناکام بنایا جاسکے۔ سرینگر میں بھی کئی مقامات پر ناکے لگا ئے گئے  جہاں سیکورٹی فورسز اہلکار لوگوں خاص کر موٹر سائیکل سواروں کو روک کر ان کے شناختی کارڈ و دیگر کاغذات چیک کر رہے ہیں اور ان سے ضروری پوچھ گچھ بھی کی جا رہی ہے۔