بلال فرقانی
سرینگر//مغربی ایشیا میں بڑھتے ہوئے تنازعہ کی وجہ سے پروازوں میں بڑے پیمانے پر رکاوٹوں کے بعد جموں و کشمیر سے تعلق رکھنے والے متعدد عمرہ زائرین مبینہ طور پر سعودی عرب میں پھنسے ہوئے ہیں۔ بتایا جاتا ہے کہ متاثرہ عازمین عمرہ کی ادائیگی مکمل کرنے کے بعد اس وقت مکہ، مدینہ اور جدہ میں ہیں۔ فضائی حدود کی پابندیوں اور پورے خطے میں آپریشنل رکاوٹوں کی وجہ سے ہندوستان کے لیے طے شدہ واپسی کی پروازیں یا تو منسوخ یا تاخیر کا شکار ہو گئیں ہیں۔وادی میں متعدد زائرین کے اہل خانہ نے بتایا کہ وہ اپنے رشتہ داروں سے رابطے میں ہیں، جو اس وقت پہلے سے موجود ہوٹلوں میں مقیم ہیں۔ بہت سے لوگ تازہ سفری مشورے اور نظرثانی شدہ پروازوں کے نظام الاوقات کے منتظر ہیں۔
سعودی عرب میں ہندوستانی سفارتی مشن صورتحال پر گہری نظر رکھے ہوئے ہیں اور ٹور آپریٹرز اور پھنسے ہوئے شہریوں سے رابطے میں ہیں۔ سمجھا جاتا ہے کہ ہندوستانی سفارت خانہ سعودی حکام اور ایئر لائنز کے ساتھ رابطہ کر رہا ہے تاکہ ہندوستانی عازمین کی بحفاظت واپسی میں سہولت فراہم کی جا سکے۔حکام نے عازمین حج کو مشورہ دیا ہے کہ وہ اپنے متعلقہ ٹور کوآرڈینیٹرز اور سفارت خانے کی ہیلپ لائنز سے رابطے میں رہیں اور سفری انتظامات سے متعلق سرکاری اپ ڈیٹس پر عمل کریں۔
