سرینگر//لبریشن فرنٹ اور سالویشن مومنٹ نے ندیم خطیب کی برسی پر انہیں خراج عقیدت ادا کرتے ہوئے کہا ہے کہ پائلٹ ندیم خطیب جیسے جوان رواں جدوجہد کی علامت ہیں۔لبریشن فرنٹ چیئرمین محمد یاسین ملک نے خراج عقیدت ادا کرتے ہوئے کہا ’’ندیم خطیب امریکہ میں خوشحال زندگی بسر کررہا تھا لیکن اُس نے تحریک کیلئے اپنی جان کی بازی لگادی اور اپنی قربانی سے بہادری، عزت اور قربانی کا لازوال باب رقم کیا ‘‘۔یاسین ملک نے کہا کہ وہ کشمیر کے ایک سچے سپوت تھے جنہوں نے دین متین کیلئے اپنی زندگی صرف کی اور آزادی کیلئے جدوجہد کی راہ میں اپنی جان کی بازی بھی لگادی۔انہوں نے کہا کہ ندیم خطیب ایک پیدائشی انقلابی تھا ۔ملک کے بقول مرحوم نے بسکو اسکول میں اپنے دوست اشفاق مجید وانی کے ہمراہ جدوجہد کا آغاز کیا اور دونوں اسی راہ عزیمت میں جاں بحق ہوگئے ۔ انہوںنے کہا کہ امریکہ میں خوشحال زندگی بسر کررہے کمرشل پائلٹ ندیم خطیب اُن لوگوں کیلئے چشم کشا ہے جو تحریک آزادی جموں کشمیر کوغربت ،کمزور ا قتصادیات اوربے روزگاری سے جوڑتے ہیں۔یاسین ملک نے کہا کہ آج جب ہم اپنے ان جیالوں کو یاد کررہے ہیں، ہم اپنے اس عہد کا اعادہ کرتے ہیں کہ انکی مقدس تحریک کو اس کی حقیقی منزل تک پہنچانے کیلئے جدوجہد کرتے رہیں گے۔ سالویشن مومنٹ چیئرمین ظفر اکبر بٹ نے خراج عقیدت پیش کرتے ہوئے کہا کہ پائلٹ ندیم خطیب جموں وکشمیر کا ایک عظیم سپوت اور بہادربیٹاتھا جس نے عیش و عشرت کی زندگی ٹھکراکر رواں جدوجہدمیں عملی شمولیت اختیار کی۔دریں اثناء سالویشن مومنٹ کے ایک وفد نے محمد حنیف کی قیادت میں لبریشن فرنٹ چیئرمین محمد یاسین ملک کے گھر جاکر اُن کی مزاج پرسی کی ۔
پائلٹ ندیم خطیب رواں جدوجہد کی علامت
