وقف بورڈ کے اثاثوں کو منفعت بخش بنایا جائیگا: درخشاں اندرابی

سرینگر//جموں و کشمیر وقف بورڈ کی چیئرپرسن ڈاکٹر درخشاں اندرابی نے جموں میں ریذیڈنسی روڈ پر اوقاف پالیکہ بازار کمپلیکس عمارت کا افتتاح کیا۔اوقاف پالیکا بازار ایک کثیر المنزلہ کمپلیکس ہے جسے وقف بورڈ نے جموں شہر میں اولین مقام پر وقف اراضی پر تعمیر کیا ہے۔ اس میں تجارتی شاپنگ سینٹرز، آفس کمپلیکس، میٹنگ ہالز اور فوڈ کورٹ کی جگہیں بھی ہیں۔ افتتاح کے فوراً بعد پہلے سے منتخب شدہ الاٹیوں کو  دکانیں فراہم کی گئیں جنہیں بورڈ کی جانب سے الاٹمنٹ کے شفاف عمل کے بعد چنا گیا تھا۔ ذرائع ابلاغ کے نمائندوں سے بات کرتے ہوئے درخشاں اندرابی نے کہا کہ انہیں یہ دیکھ کر خوشی ہوئی کہ جموں میں پرائم پلیس پر اس طرح کا ایک فائدہ مند عمارت تعمیر کی گئی ہے اور وہ دیکھیں گی کہ پورے یو ٹی میں مختلف اہم مقامات پر اس طرح کے مزید میگا سٹرکچر تعمیر کئے جائینگے۔ انہوںنے کہاکہ جموں و کشمیر وقف کے بے پناہ اثاثے اور جائیدادیں ہیں لیکن ہمیں وقف کے انتظامی نظام کے اندر کام کرنے میں اصلاحات لانی ہوں گی تاکہ ہم آمدنی کے بڑے ذرائع پیدا کر سکیں۔ درخشاں اندرابی نے کہاکہ وقف کو لوگوں کی امنگوں کا بورڈ بنانے کے لئے جلد ہی نئے طریقہ کار اور رہنما خطوط کا مسودہ تیار کیا جائے گا اور ان پر عمل درآمد کیا جائے گا۔ انہوںنے کہا کہ بہت بڑے اثاثوں اور جائیدادوں پر تجاوزات اور بدانتظامی کی گئی ہے اور بورڈ تجاوزات کو ہٹانے کے لئے فوری ایکشن روڈ میپ بنائے گا اور اس بات کو یقینی بنائے گا کہ وقف کے اثاثوں اور جائیدادوں کا صحیح اور قانونی استعمال کیا جائے۔ انہوں نے لوگوں سے اپیل کی کہ وہ جموں و کشمیر میں وقف کے انتظام کو ہموار کرنے میں نئے بورڈ کے ساتھ تعاون کریں۔تقریب میں جموں و کشمیر وقف بورڈ کے ممبران سہیل کاظمی اور نواب الدین کے علاوہ ایڈیشنل سیکریٹری ریونیو (حج و اوقاف) مظفر ملک، وقف بورڈ کے سی ای او ڈاکٹر سید ماجد جہانگیر، ایڈمنسٹریٹر مدثر اقبال، بورڈ کی انتظامیہ اور سرکردہ عوامی شخصیات موجود تھے۔