وزیر اعلیٰ اور گورنر کا کئی معاملات پر تبادلہ خیال

سرینگر//وزیر اعلیٰ محبوبہ مفتی نے راج بھون میں گورنر این این ووہرا کے ساتھ ملاقات کی ۔ گورنر اور وزیر اعلیٰ نے پولیس اہلکاروں پر ہو رہے لگاتار حملوں بشمول جامع مسجد علاقے میں ڈی ایس پی محمد ایوب پنڈت کے بیہمانہ قتل سے جُڑے معاملات اور ایسے واقعات سے متاثرہ افراد کے کنبوں کو امداد فراہم کرنے کیلئے اٹھائے جانے والے اقدامات کے بارے میں تبادلہ خیال کیا ۔ اس سے قبل مرکزی وزیر داخلہ سے ہوئی ملاقات کے پیش نظر گورنر نے وزیر اعلیٰ کے ساتھ فیلڈ میں کام کر رہے پولیس افسروں کو بلٹ پروف جیکٹ اور گاڑیاں اور دیگر حفاظتی ساز و سامان مہیا کرنے پر بھی تبادلہ خیال کیا۔ وزیر اعلیٰ نے جموں کشمیر میں جی ایس ٹی کو لاگو کرنے کیلئے کئے جا رہے اقدامات کے بارے میں گورنر کو جانکاری دی ۔دونوں نے اس بات پر اتفاق کیا کہ جی ایس ٹی کو لاگو کرنے میں تاخیر کی وجہ سے ریاست کے لوگوں کو نقصانات سے دو چار ہونا پڑے گا اور ریاستی اقتصادیات پر منفی اثرات مرتب ہوں گے ۔ گورنر اور وزیر اعلیٰ نے تعلیمی سرگرمیوں کو ہو رہے نقصانات پر بھی تبادلہ خیال کرنے کے علاوہ نوجوانوں خصوصاً طالب علموں کے مفادات کو تحفظ فراہم کرنے کیلئے ممکنہ اقدامات پر بھی خیالات کا تبادلہ کیا ۔