سرینگر//جموں و کشمیر خاص طور پر کشمیر ڈویژن میں ایک بار پھر ایکٹو کیسز بڑھنے لگے ہیں کیونکہ پچھلے 15 دنوں میں مثبت کیسز 800 سے بڑھ کر 981 ہو گئے ہیں۔سرکاری اعداد و شمار کے مطابق اس سال 20 اکتوبر کو جموں و کشمیر میں فعال کیسوں کی کل تعداد 800 تھی جن میں 673 کشمیر اور 127 جموںصوبے سے تھے۔تاہم، پچھلے 15 دنوں میں جموں و کشمیر میں ایکٹو کیسز 800 سے بڑھ کر 981 ہو گئے ہیں جس میں کشمیرکے 860 معاملات شامل ہیں اور جموں صوبے میں 121 کا اضافہ ہو ا ہے۔اعداد و شمار کے مطابق کشمیر میں ایکٹو کیسز کی تعداد 673 سے بڑھ کر 860 ہو گئی ہے جبکہ جموں ڈویژن میں اسی مدت میں کیسز 127 سے کم ہو کر 121 ہو گئے ہیں۔جموں ڈویژن کے ایکٹو کیسز کے مقابلے میں کشمیر ڈویژن میں تقریبا آٹھ گنا زیادہ ایکٹیو کیسز ہیں۔جموں صوبے میں، جموں ضلع میں سب سے زیادہ 45 ایکٹو کیسز ہیں جبکہ کشمیر میں، سرینگر میں سب سے زیادہ 476 ایکٹو کیس ہیں۔دریں اثنا، مرکزی وزارت صحت نے جموں و کشمیر سمیت تین ریاستوں/ مرکز کے زیر انتظام علاقوں سے کہا ہے کہ وہ بڑھتے ہوئے COVID-19 کیسوں کی تعداد اور ہفتہ وار مثبت شرحوں کا جائزہ لیں اور جانچ کو بڑھا دیں۔مرکزی وزارت صحت کے ایڈیشنل سکریٹری آہوجا نے صحت کے ایڈیشنل چیف سکریٹری، جموں و کشمیر کو لکھے ایک خط میں کہاہے کہ مرکز کے زیر انتظام علاقے میں ہفتہ وار نئے کیسوں میں تقریباً 61 فیصد اضافہ ہوا ہے۔انہوں نے کہا کہ 25-31 اکتوبر کے ایک ہفتے میں 1,354 کیسز رپورٹ ہوئے جبکہ 18-24 اکتوبر کے ہفتے میں 843 کیسز رپورٹ ہوئے تھے۔ انہوں نے کہا"ہفتہ وار مثبت شرح 1 فیصد سے کم ہے، لیکن پچھلے دو ہفتوں میں مثبت کیسوں میں 67 فیصد اضافہ ہوا ہے جو کہ 18-24 اکتوبر کے ہفتے میں 0.3 فیصداور 25-31 اکتوبر کے ہفتے میں 0.5 فیصد تک پہنچ گیا ہے"۔کیسوں کی زیادہ تعداد اور 2.5 فیصد سے زیادہ مثبت ہونے کی وجہ سے کٹھوعہ تشویشناک ضلع ہے۔ اس کے علاوہ جموں و کشمیر میں جانچ کو بڑھانے کی ضرورت ہے۔
کورونا سے مزید95متاثر، کوئی فوتیدگی نہیں
پرویز احمد
سرینگر //جموں و کشمیر میں روزانہ وائرس سے متاثر ہونے والے افراد کی تعداد میں اُتار و چڑائو کا سلسلہ جاری ہے۔ پچھلے 24گھنٹوں کے دوران کورونا وائرس کی تشخیص کیلئے41ہزار 892ٹیسٹ کئے گئے جن میں 2مسافروں سمیت مزید 95افراد کی رپورٹیں مثبت آئی ہیں۔متاثرین کی مجموعی تعداد 3لاکھ 32ہزار 651تک پہنچ گئی ہے۔ اس دوران مسلسل تیسرے دن بھی کورونا وائرس سے کسی کی موت نہیں ہوئی ہے۔ متوفین کی مجموعی تعداد 4438بنی ہوئی ہے۔ گذشتہ 24 گھنٹوں کے دوران کورونا وائرس سے متاثر ہونے والے 95افراد میںجموں میں 14 جبکہ کشمیر میں 81 افراد وائرس سے متاثر ہوئے ہیں۔ کشمیر میں میں مثبت قرار دئے گئے 81افراد مقامی سطح پر رابطے میں آنے کی وجہ سے متاثر ہوئے ہیں۔ متاثرین میں سب سے زیادہ سرینگر میں 35، بارہمولہ میں 14، بڈگام میں 13 ،پلوامہ میں 4، کپوارہ میں 6،بانڈی پورہ میں 4،گاندربل میں 4، شوپیان میں 1 جبکہ اننت ناگ اورکولگام میں کسی کی رپورٹ مثبت نہیں آیا ہے۔ کشمیر میں متاثرین کی مجموعی تعداد 2لاکھ 8ہزار 258تک پہنچ گئی ہے۔ اس دوران کشمیر میں مسلسل تیسرے دن بھی کورونا وائرس سے کسی کی موت نہیں ہوئی ہے۔ وادی میں متوفین کی مجموعی تعداد 2262بنی ہوئی ہے۔ جموں صوبے کے ادھمپور، راجوری، سانبہ،کشتواڑ، رام بن اور ریاسی میں کسی کی رپورٹ مثبت نہیں آئی ہے جبکہ دیگر 4اضلاع میں 14افراد کی رپورٹیں مثبت قرار دی گئی ہیں۔ جموں صوبے میں مثبت قرار دئے گئے14افراد میں 2بیرون ریاستوں سے سفر کرکے جموں پہنچے جبکہ 12افراد مقامی سطح پر رابطے میں آنے کی وجہ سے متاثر ہوئے ہیں۔ جموں صوبے کے 14متاثرین میں جموں میں 8،ڈوڈہ میں 2، کٹھوعہ میں 3 جبکہ پونچھ میں 1کی رپورٹ مثبت آئی ہے۔ جموں صوبے میں متاثرین کی مجموعی تعداد 1لاکھ 24ہزار 393تک پہنچ گئی ہے۔اس دوران جموں صوبے میں مسلسل 7ویں دن بھی وائرس سے کسی کی موت نہیں ہوئی ہے۔ متوفین کی مجموعی تعداد 2176بنی ہوئی ہے۔
ملک میں12,885کیسز،461ہلاکتیں
نئی دہلی/یو این آئی/ ملک میں گذشتہ 24 گھنٹوں میں کورونا کے کے 12 ہزار سے زائد کیسز درج ہوئے اور 15054 مریض صحتیاب ہو چکے لیکن اس دوران461 مزید مریضوں کی موت بھی ہو گئی ۔ بدھ کے روز ملک میں 3090920 افراد کو کورونا کے ٹیکے لگائے گئے اور اب تک ایک ارب 7 کروڑ 63 لاکھ 14 ہزار سے زیادہ افراد کو کووڈ ویکسین دی جا چکی ہے ۔اعداد و شمار کے مطابق گذشتہ 24 گھنٹوں میں کورونا کے 12885 نئے کیسز سامنے آنے کے ساتھ ہی متاثرہ افراد کی تعداد بڑھ کر 34321032 ہو گئی ہے ۔ اس دوران 15054 مریضوں کے صحتیاب ہونے کے بعد اس وبا کو شکست دینے والوں کی کل تعداد 33712794 ہوگئی ہے ۔فعال کیسز 2630 کم ہو کر ایک لاکھ 48 ہزار 579 رہ گئے ہیں۔ اس دوران 461 مریضوں کی موت کے بعد ہلاکتوں کی تعداد چار لاکھ 59 ہزار 652 ہو گئی ہے ۔
