سرینگر// انجمن نصرہ الاسلام ،جمعیت ہمدانیہ، انجمن حمایت الاسلام ،حقانی میموریل ٹرسٹ اور نیشنل کانفرنس نے کشمیر کے نامور عالم مولانا محمد قاسم شاہ بخاری کے 22ویں یوم وصال پرانہیں خراج عقیدت ادا کیا ہے۔ انجمن نصرۃ الاسلام نے ایک بیان میں مولانا کی طویل تدریسی ،تعلیمی ، تصنیفی ، تبلیغی اور تفسیری خدمات کو ملت کشمیر کیلئے انتہائی قابل قدر اور بیش بہا اثاثہ قرار دیتے ہوئے کہا کہ مولانا بخاری کی تصنیفی اور تالیفی خدمات کے سبب ملت انہیں صدیوں تک یاد رکھے گی اور ان کے افکارو علوم سے استفادہ حاصل کرے گی۔بیان میں انجمن نے صدر تنظیم میرواعظ محمد عمر فاروق کی جانب سے مرحوم کی خدمات کو خراج عقیدت پیش کرتے ہوئے اُن کے درجات کی بلندی کیلئے دعا کی۔ جمعیت ہمدانیہ کے سربراہ مولانا ریاض احمد ہمدانی نے خراج عقیدت پیش کرتے ہوئے کہاکہ اسلام کی تبلیغ واشاعت میں موصوف نے جو رول ادا کیا وہ رہتی دنیا تک قایم رہے گا۔بیان کے مطابق مرحوم کی کوششوں کی بدولت حنفیہ کالج میں دینی تعلیم کے حصول کیلئے سینکڑوں نوجوان آج زیر تعلیم ہیں ۔انجمن حمایت الاسلام کے صدر مولانا خورشید احمد قانونگو، مولانا شوکت حسین کینگ اور مولانا عبدالحق اویسی نے کشمیر کی عظیم علمی شخصیت مولانا محمد قاسم شاہ بخاری کو خراج عقیدت پیش کرتے ہوئے کہاکہ موصوف درس و تدریس ، تفسیر حدیث فقہ، سیرت اخلا قیات اور درودواذکار بالخصوص کشمیر کے اولیاء عظام کی روحانی بصیرت پر مبنی خدمات کی علمی و روحانی گرہ کشائی کے کارنامے انجام دیئے اور اس نقطہ عروج پر پہنچایا اس زمانے میں اب محال نظر آتا ہے۔ انہوںنے کہاکہ مولانا محمد قاسم شاہ بخاری کے علمی صلاحیتوں و کارناموں کی ایک محتاج تشہر نہیں ہے بلکہ ان کی خدمات مرحوم کے علمی صلاحیتوں و کارناموں کی ایک محتاج تشہیر نہیں ہے ۔ٹرسٹ کے سرپرست اعلیٰ سید حمید اللہ حقانی اور جنرل سکریٹری بشیر احمد ڈار نے خراج عقیدت پیش کرتے ہوئے کہا ہے کہ مرحوم ایک ہمہ جہت شخصیت کے مالک تھے جنہوں نے دینی ، تعلیمی، اور اصلاحی میدانوں میں بیش بہا خدمات انجام دیں ۔ نیشنل کانفرنس صدرڈاکٹر فاروق عبداللہ نے خراج عقیدت پیش کرتے ہوئے کہا کہ مرحوم نے زندگی کے آخری لمحہ تک تبلیغ دین اور ملی خدمات انجام دیں ۔انہوں نے کہا موصوف نے حنفیہ عربی کالج کی بھی بنیاد ڈالی جس میں آج تک ریاست کے کونے کونے سے تعلق رکھنے والے کثیر تعداد میں نوجوانوںنے علم دین حاصل کیا۔ پارٹی کے نائب صدر عمر عبداللہ،جنرل سکریٹری علی محمد ساگر، معاون جنرل سیکریٹری ڈاکٹر مصطفی کمال اور سینئر لیڈران عبدالرحیم راتھر، محمد شفیع اوڑی، شریف الدین شارق، میاں الطاف احمد ،مبارک گل،چودھری محمد رمضان، محمد اکبر لون اور پیر ذادہ احمد شاہ نے بھی مرحوم کو خراج عقیدت پیش کیا۔
نامور عالم دین مولانا قاسم شاہ بخاری کی برسی
