ممکنہ تیسری لہر سے نمٹنے کیلئے منصوبہ تیار | ویکسی نیشن مہم تیز کرنے کیلئے چیف سیکریٹری کی ہدایت

سرینگر//چیف سیکریٹری ڈاکٹر ارون کمار مہتہ نے جموں و کشمیر میں کووڈ کی تیسری لہر سے نمٹنے کیلئے پروفیسر محمد سلطان کھورو کی سربراہی میں ایک ماہر مشاورتی کمیٹی کی سفارشات کے تحت ایکش پلان کی تیاری کی نگرانی کیلئے منعقدہ ایک میٹنگ کی صدارت کی ۔ فائنانشل کمشنر ہیلتھ اینڈ میڈیکل ایجوکیشن پروفیسر محمد سلطان کھورو اور نیشنل ہیلتھ مشن ( این ایچ ایم ) کے مشن ڈائریکٹر نے میٹنگ میں شرکت کی ۔ چیف سیکریٹری نے اعلیٰ سطح کی جانچ اور ویکسی نیشن کی شرح برقرار رکھنے اور کووڈ سے سرشار طبی سہولیات کو بڑھاوا دے کر کووڈ 19 وبائی مرض کا مقابلہ کرنے میں محکمہ صحت اور میڈیکل ایجوکیشن کی کاوشوں کی تعریف کی ۔ انہوں نے اس بیماری پر قابو پانے کیلئے بھر پور ویکسی نیشن ڈرائیو کے علاوہ مناسب طرز عمل کو سختی سے نافذ کرنے کی ضرورت پر زور دیا ۔ چیف سیکریٹری نے محکمہ صحت اور میڈیکل ایجوکیشن سے کہا کہ وہ کووڈ 19 کے شواہد پر مبنی سائینسی انتظام کیلئے کثیر جہتی سائنسی سفارشات فراہم کرنے کیلئے ایک طبی مشاورتی ٹیم تشکیل دیں جو وائیرس ، ایپیڈیمیولوجی اور مائکرو بیولوجی کے شعبے کے ماہرین پر مشتمل ہو ۔ چیف سیکریٹری نے محکمہ کو ہدایت دی کہ وہ جموں و کشمیر میں حساس گروپوں اور علاقوں کی نشاندہی کر کے ویکسی نیشن مہم کو تیز تر کریں ۔