حیدرآباد//سوشل ورک کے ممتاز اسکالر اور دانشورپروفیسر ایچ وائی صدیقی کا77 برس کی عمر میں نئی دہلی میں کل شام انتقال ہوگیا۔ پروفیسر صدیقی ایک مہینے سے دہلی کے اپولو ہاسپٹل میں زیر علاج تھے ۔پروفیسر صدیقی 35 برسوں تک جامعہ ملیہ اسلامیہ ، نئی دہلی کے شعبہ سوشل ورک میں تعلیم و تدریس سے وابستہ رہے ۔انہوں نے مولانا آزاد نیشنل اردو یونیورسٹی ،حیدرآباد کے شعبہ سوشیل ورک کے ابتدائی برسوں میں شعبہ کی صورت گری ،استحکام اور شناخت بنانے میں اہم رول ادا کیا۔ پروفیسر صدیقی نے اس مضمون میں عالمی پیمانے پر اپنی صلاحیت کا لوہا منوایا۔پروفیسر صدیقی کی کتابیں ملک کے بیشتر اداروں میں داخل نصاب ہیں۔ وہ سوشل ورک سے متعلق تشکیل دی گئی متعدد کمیٹیوں اور رپورٹوں سے وابستہ رہے ۔ انھوں نے دنیا کے مختلف ممالک میں سوشل ورک کی تعلیم اور اس کے طریقہ کار پر بحث و مباحثے پر اچھوتے انداز میں گفتگو کی۔ واضح رہے کہ پروفیسرصدیقی جامعہ ملیہ اسلامیہ سے سبکدوشی کے بعد چار برسوں تک مولانا آزاد نیشنل اردو یونیورسٹی کے شعبہ سوشل ورک سے وابستہ رہے ۔ یونیورسٹی کی بہت ساری دیگرسرگرمیوں میں بھی متحرک رہے ۔
ممتاز سکالرپروفیسرحسین یٰسین صدیقی کا انتقال
