پونچھ //خطہ پیر پنچال اور وادی کے درمیان تعمیر ہوئی مغل شاہراہ کی بحالی کیلئے میکینکل شعبہ کی جانب سے عملی طورپر کام شروع کیا گیا ہے ۔دونوں خطوں کے درمیان رابطہ بحال کرنے کیلئے بفلیاز اور شوپیاں دونوں اطراف سے سڑک کی بحالی اور برف ہٹانے کا عمل شروع کیا گیا ہے ۔میکینکل شعبہ کے مطابق بفلیاز کی جانب سے 31کلو میٹر علاقہ سے بر ف ہٹا لی گئی ہے جبکہ مشینری چھتہ پانی کے قریب پہنچ گئی ہے اسی طرح شوپیاں کی طرف سے 23کلو میٹر شاہراہ کو صاف کردیا گیا ہے اور مشینری نے دوبجیاں علاقہ پار کرلیا ہے ۔ حکام کی جانب سے بتایا گیا ہے کہ جلد ہی شاہراہ کو بحال کرنے کیلئے تیار کرلیا جائے گا تاہم برفباری کی وجہ سے آئی پسیاں اس عمل میں بڑی رکائوٹ ثابت ہورہی ہیں ۔واضح رہے کہ تاریخی مغل شاہراہ موسمِ سرما میں شدید برف باری کی وجہ سے گاڑیوں کی آمدورفت کیلئے بند کیا جاتا ہے جبکہ ہر برس مارچ کے ماہ میں شاہراہ سے برف ہٹانے کا کام شروع کیا جاتا ہے۔ پونچھ حکام کی جانب سے بھی گزشتہ کئی دنوں سے شاہراہ پر برف ہٹانے کا کام چلایا جا رہا ہے جبکہ ابھی تک31کلو میٹر تک کے علاقہ سے بر ف ہٹا لی گئی ہے۔متعلقہ محکمہ کے ایک آفیسر نے امید ظاہر کرتے ہوئے کہاکہ جلد ہی شاہراہ سے برف ہٹا لی جائے گی تاہم اس پر گاڑیوں کی آمد ورفت بحال کرنے کا فیصلہ حکام کی جانب سے لیا جائے گا تاہم اپریل ماہ کے آخر تک شاہراہ پر گاڑیوں کی آمد ورفت بحال ہونے کی امیدیں ظاہر کی جارہی ہیں ۔
مغل شاہراہ پر دونوں اطراف سے برف ہٹانے کا عمل جاری | بفلیاز سے 31کلو میٹر جبکہ شوپیاں سے 23کلو میٹر سڑک کلیئر
