جموں//مسلح افواج کے یوم پرچم کی تقریبات جموں ڈویژن بھر میں منعقد کی گئیں جس میں بہادر فوجیوں کے ساتھ اظہار یکجہتی اور فلیگ فنڈ میں حصہ ڈالنے کے لیے منعقدہ خراج تحسین پیش کیا گیا۔ڈوڈہ میں ضلع انتظامیہ ڈوڈہ نے مسلح افواج کے پرچم کا دن منایاجہاں ڈپٹی کمشنر وکاس شرما کی قیادت میں افسران نے بہادر سپاہیوں کو سلامی پیش کی اور ملک میں امن برقرار رکھنے اور دشمنوں کے خلاف سرحدوں کی حفاظت کے لیے مسلح افواج کی ستائش کی۔قبل ازیں ضلع سینک ویلفیئر آفیسر ونگ کمانڈر تیرتھ سنگھ نے اپنی ٹیم کے ساتھ ڈپٹی کمشنر آفس کا دورہ کیا اور مسلح افواج کے یوم پرچم اور اس کی اہمیت کے بارے میں افسران کو آگاہ کیا۔ کٹھوعہ میں ضلع انتظامیہ کٹھوعہ نے حب الوطنی کے جوش اور جذبے کے ساتھ مسلح افواج کے پرچم کا دن منایا۔اس موقع پر ضلع اور سیکٹرل افسران، این سی سی کیڈٹس، سابق فوجی اور ضلع سینک ویلفیئر بورڈ، کٹھوعہ کے افسران ڈی سی آفس میں جمع ہوئے جہاں ڈپٹی کمشنر راہول یادو نے مسلح افواج کے پرچم دن کی اہمیت پر روشنی ڈالی۔رام بن میں ضلع انتظامیہ رام بن نے فوجیوں اور سابق فوجیوں اور شہیدوں کے خاندانوں کی فلاح و بہبود کے لیے فنڈز اکٹھا کرنے کے لیے مسلح افواج کے پرچم کا دن منایا۔ڈسٹرکٹ ہیڈ کوارٹر میں ڈپٹی کمشنر مسرت الاسلام کے ساتھ ڈی ڈی سی کونسلر رینوکا کٹوچ، ایڈیشنل ڈپٹی کمشنر، ہربنس لال، سی پی او، ڈاکٹر کرتاری لال، اے سی ڈی، اے سی آر اور کئی دیگر سینئر افسران، عملہ کے ارکان، طلباء اور عوام نے شہید فوجیوں کو خراج تحسین کیا۔ڈی سی نے خطاب کرتے ہوئے کہا کہ تمام اہل وطن کو چاہیے کہ وہ قوم کے بہادر سپاہیوں کا احترام کریں اور سابق فوجیوں اور شہداء کے خاندانوں کی فلاح و بہبود کے لیے پہل کریں۔ ڈی سی نے افسران پر زور دیا کہ وہ سابق فوجیوں کے مسائل کو ترجیحی بنیادوں پر حل کریں تاکہ ہندوستانی قوم کی حفاظت اور سلامتی کے لیے ان کے تعاون کا اعتراف کیا جا سکے۔ دریں اثناء آرمڈ فورسز فلیگ ڈے کے حوالے سے ایک سیمینار کا بھی انعقاد کیا گیا جس میں مختلف سکولوں کے طلباء اور مہمان مقررین نے اس دن کی اہمیت پر روشنی ڈالی۔رام بن کی ابھرتی ہوئی گلوکارہ منیشا مہرا نے اپنی سریلی آواز میں حب الوطنی کا گانا گایا جس نے فضا کو حب الوطنی کے جذبے سے بھر دیا۔ کشتواڑ میں آرمڈ فورسز فلیگ ڈے کے سلسلے میں ضلع انتظامیہ کشتواڑ کی طرف سے جی ڈی سی کشتواڑ کے این سی سی اور این ایس ایس کیڈٹس کے ساتھ مل کر رضاکارانہ فنڈ جمع کرنے کی مہم شروع کی گئی۔ یہ مہم ضلع بھر میں ڈپٹی کمشنر اشوک شرما کی مجموعی نگرانی میں منعقد کی گئی۔کانفرنس ہال کمپلیکس میں مرکزی پروگرام کی صدارت ڈپٹی کمشنر نے کی جس میں اے ڈی ڈی سی شام لال ، اے ڈی سی کشوری لال شرما، اے سی آر کشتواڑ اختر حسین قاضی اور دیگر افسران نے شرکت کی۔این سی سی آفیسر جی ڈی سی کشتواڑ مدھو بالا کے علاوہ این ایس ایس آفیسر اجے کمار اور سونوما سین کے ساتھ کیڈٹس نے بھی پروگرام میں شرکت کی۔ڈی سی کشتواڑ نے آرمڈ فورسز فلیگ ڈے کی اہمیت پر روشنی ڈالی اور کیڈٹس کو مختلف محکموں اور بازاروں میں عام شہریوں سے فنڈز اکٹھا کرنے کے طریقہ کار کے بارے میں بتایا۔ اکاؤنٹس آفیسر ڈی سی آفس کشتواڑ عمران احمد کچلو نے بتایا کہ سول سوسائٹی اور دفاتر کی طرف سے مسلح افواج کی قربانیوں کے اعزاز کے طور پر کل 60,000 روپے کی رقم عطیہ کی گئی۔ پونچھ ضلع سینک ویلفیئر بورڈ آفس میں مسلح افواج کا یوم پرچم منایا گیا جہاں ڈپٹی کمشنر اندر جیت اس موقع پر مہمان خصوصی تھے۔پروگرام کا آغاز مہمان خصوصی کی طرف سے ترنگا لہرانے سے ہوا جس کے بعد قومی ترانہ گایا گیا۔
زرعی یونیورسٹی میںبھی آرمڈ فورس فلیگ ڈے منایاگیا
جموں:آزادی کا امرت مہوتسو منانے کے تسلسل میں شیر کشمیر یونیورسٹی آف ایگریکلچرل سائنسز اینڈ ٹیکنالوجی جموں کے آر ایس پورہ کیمپس میں ویٹرنری سائنسز اینڈ اینیمل ہسبنڈری کی فیکلٹی میں آرمڈ فورس فلیگ ڈے منایا گیا۔ اس موقع پر وائس چانسلر پروفیسر جے پی شرما کی رہنمائی میں ڈین ایف وی ایس سی اور اے ایچ، پروفیسر ایم ایس بھڈوال نے طلبہ کو یوم پرچم منانے کی اہمیت سے روشناس کیا۔ انہوں نے فیکلٹی اور طلباء کو ہمارے جنگی ہیروز اور ان کے خاندانوں کے لیے فنڈ ریزنگ کے لیے زیادہ سے زیادہ عطیہ دینے کی ترغیب دی۔
