مزید خبریں

سرنکو ٹ //سرنکوٹ کی فضل آباد لوہر بی پنچایت میں پچھلے کئی ہفتوں سے پانی نہیں ہے۔ایک مقامی شہری ممتاز ملک نے بتایاکہ علاقے میں پانی کی ہاہاکار مچی ہوئی ہے لیکن محکمہ کو کوئی پرواہ نہیں ہے اور نہ ہی سپلائی کی بحالی کیلئے کوئی سنجیدگی دکھائی جارہی ہے۔انہوں نے کہاکہ لوگ اب احتجا ج کا راستہ اختیار کرنے پر مجبور ہورہے ہیں۔ان کاکہناتھاکہ پانی کے بغیر ان کا جینا دوبھر ہوگیاہے اور کئی کلو میٹر دور سے پانی لاناپڑتاہے۔مقامی سرپنچ عبدالمجید نے بتایاکہ پانی کی شدید قلت کاسامناہے ،عارضی ملازم ہڑتال پر ہیں لیکن مستقل ملازمین پائپ کے ساتھ ہاتھ بھی نہیں لگارہے۔انہوں نے کہاکہ متعلقہ جونیئر انجینئر کام کرکے بھی راضی نہیں ہے ،اسے اگر فون کرکرکے تنگ آچکے ہیں لیکن سپلائی کی بحالی کیلئے کوئی اقدام نہیں کیاجارہا۔انہوں نے کہاکہ یاتو انہیں پانی فراہم کیاجائے یاپھر لاپرواہ ملازمین کافوری طور پر تبادلہ کیاجائے اور ایسے ملازم تعینات کئے جائیں جو اپنے کام کے تئیں سنجیدہ ہوں۔

 

 

سمت بھارگو 

راجوری//پونچھ کے قصبہ گاؤں کا ایک ادھیڑ عمر شخص جو دسمبر 2020 سے لاپتہ تھا،کوپاکستانی فوج نے بھارتی حکام کے حوالے کر دیا ہے۔حکام نے بتایا کہ حال ہی میں پاکستانی فوج نے ہندوستانی فریق کے ساتھ رابطہ قائم کیا اور بتایا کہ لائن آف کنٹرول کے دوسری طرف پونچھ سے ایک شخص کا سراغ لگایا گیا ہے۔دونوں فریقوں کے درمیان باضابطہ معلومات اور مواصلات کے تبادلے کے بعد پاکستانی فوج نے جمعرات کو چکن دا باغ سے مذکورہ شخص کو واپس بھیج دیا۔انہوں نے مزید کہا کہ اس شخص کوفوج، پولیس اور مجسٹریٹ پر مشتمل ٹیم کے ذریعے موصول کیاگیا۔حکام نے بتایا کہ اسے پولیس کیمپ میں لے جایا گیا ہے جہاں قانونی کارروائیاں جاری ہیں۔انہوں نے مزید کہا کہ یہ شخص دسمبر 2020 سے لاپتہ ہے اور لاپتہ ہونے کی رپورٹ مقامی تھانے میں بھی درج ہے۔ڈپٹی ایس پی ہیڈ کوارٹر محمد نواز نے بتایا کہ مذکورہ شخص کو پاک فوج سے ملنے کے بعد اسے تحویل میں لے لیا گیا ہے اور مزید تفتیش اور قانونی کارروائی جاری ہے۔

 

عظمیٰ یاسمین

 تھنہ منڈی // بھاجپا کے سینئر لیڈر و ممبر قانون ساز کونسل وبودھ گپتا کی صدارت میں ڈاک بنگلہ تھنہ منڈی میں بی جے کارکنان کا ایک اہم اجلاس منعقد ہوا جس میں مختلف مسائل پر تبادلہ خیال کیا گیا۔ واضح رہے کہ چار ریاستوں میں بی جے پی کی حالیہ جیت کے بعد بی جے پی کے سینئر لیڈر اور سابقہ ایم ایل سی وبودھ گپتا تھنہ منڈی میں پارٹی کارکن سے ملاقات کے لئے ڈاک بنگلہ تھنہ منڈی پہنچے جہاں پارٹی کارکنان نے ان کا والہانہ استقبال کیا۔ پارٹی کارکنوں سے خطاب کرتے ہوئے وبودھ گپتا نے کہا کہ اس خطہ کی خوشحالی اور تعمیر و ترقی کے لیے ضروری ہے کہ لوگ بھاجپا کا ساتھ دے کر ترقی اور خوشحالی کا راستہ ہموار کریں۔ انھوں نے کہا کہ ترجیحی بنیادوں پر دیہی علاقوں کی ترقی و بااختیاری کو یقینی بنایا جائے گا تاکہ ہر ایک کو اس کا حق ملے اور دیہی علاقوں کی ترقی کا خواب پورا ہو۔ انہوں نے مزید کہا کہ پچھلے چند سالوں کے دوران اس علاقے میں نمایاں ترقی ہوئی ہے اور کئی اہم پروجیکٹوں پر شد و مد کے ساتھ کام شروع کیا گیا ہے۔ پی جے پی لیڈر نے کہا کہ اس پورے علاقے میں بنیادی سہولیات کی فراہمی بھاجپا کی اولین ترجیح ہے۔انہوں نے کہا کہ وزیر اعظم ہند کی قیادت میں ہمارا ملک دنیا بھر میں اہم طاقت کے طور پر ابھر رہا ہے اور ہندوستان تیزی سے ترقی کرنے والا ملک بن گیا ہے۔ انہوں نے کہاکہ یو ٹی جموں و کشمیر کی ترقی بھی بھاجپا کی قیادت میں ہی ہو سکتی ہے کیونکہ دیگر جماعتوں نے لوگوں کے ساتھ دھوکہ کیا ہے اور ان کے مسائل حل نہیں کئے۔ اس موقع پر ڈی سی ممبر عبدالقیوم میر، بی جے پی لیڈر عبدالغنی شال، چوکیدار درہ عبدالرشید اور شبیر چوہدری کے علاوہ کی پارٹی کارکنان بھی موجود تھے۔

 

 

  

حسین محتشم

پونچھ//سید عابد حسین شاہ کے اے ایس نے جمعرات کو راجیش لکھن کی جگہ اسسٹنٹ کمشنر ڈیو لپمنٹ پونچھ کا چارج سنبھالا۔ واضح رہے کہ اس سے قبل عابد حسین شاہ ضلع پونچھ میں ڈسٹرکٹ انفارمیشن آفیسر/اے ایل سی اور ڈی ڈی ایمپلائمنٹ کے طور پر خدمات انجام دے چکے ہیں۔ چارج سنبھالنے کے فوراً بعد انہوں نے ڈپٹی کمشنر پونچھ سے ملاقات کی جنہوں نے ان کا خیرمقدم کیا اور محکمہ کے کام کاج کے بارے میں تبادلہ خیال کیا۔ نئے ACD، شاہ نے RDD ڈیپارٹمنٹ کے عملے کے ارکان سے بھی ملاقات کی اور انہیں مشورہ دیا کہ وہ عام لوگوں کی ترقی کی توقعات پر پورا اترنے کیلئے سرشار کوششیں کریں۔

 

 

سمت بھارگو +رمیش کیسر 

راجوری//راجوری کے نوشہرہ کے گاؤں ہنڈان میں ایک خاتون کی پراسرار موت کے معاملے پر کام کرتے ہوئے پولیس نے تفتیشی کارروائی کو ایف آئی آر میں تبدیل کر دیا ہے جس میں آئی پی سی کی دفعہ 34،306 کے تحت مقدمہ درج کیا گیا ہے اور متاثرہ کے شوہر اور بہنوئی کو گرفتار کیا گیا ہے۔ایک سرکاری بیان میں ایس ایس پی راجوری محمد اسلم نے کہا کہ 12 مارچ کی شام پولیس اسٹیشن نوشہرہ میں ایک اطلاع ملی کہ ایک خاتون سنیتا دیوی (35) زوجہ کرن جیت کمار سکنہ موڑا پاٹلی، چوکی ہنڈان نوشہرہ کی لاش اپنی ہی گھر میں لٹکی ہوئی ملی ۔مشتبہ موت کی اطلاع ملنے پر، ڈی ڈی آر نمبر 15 مورخہ 12/03/22 کے ذریعے نوشہرہ پولیس سٹیشن کی ٹیم کی جانب سے تفتیشی کارروائی شروع کی گئی اور سول ہسپتال نوشہرہ کے ڈاکٹروں کے ایک بورڈ کے ذریعے متوفی کا پوسٹ مارٹم کیا گیا۔ایس ایس پی نے کہا کہ ایڈیشنل ایس پی نوشہرہ امیت ورما کی سربراہی میں سب ڈویژنل پولیس آفیسر نوشہرہ توصیف ریشو اور اسٹیشن ہاؤس آفیسر نوشہرہ راجیش جسروٹیہ کے ساتھ ایک خصوصی تحقیقاتی ٹیم تشکیل دی گئی جس نے تحقیقات کے دوران چند ملزمان کے مجرمانہ فعل کو سامنے لانے میں کچھ شواہد تیار کرنے میں کامیابی حاصل کی۔اس کی بنیاد پر، فوری تفتیش کومقدمے میں تبدیل کر دیا گیا ہے جس میں ایف آئی آر نمبر35 /2022پولیس سٹیشن نوشہرہ میں درج کرلیا گیا ہے ۔انہوں نے کہا کہ مذکورہ کیس کی تفتیش کے دوران دو ملزمان یعنی کرن جیت کمار (متاثرہ کا شوہر) اور جتیندر کمار (متاثرہ کا بہنوئی) راج کمار کے دونوں بیٹوں کو گرفتار کیا گیا ہے۔انہوں نے کہا کہ کیس کی مزید تفتیش جاری ہے۔ایس ایس پی راجوری محمد اسلم نے عام لوگوں بالخصوص نسوانی جنس سے اپیل کی ہے کہ وہ آگے آئیں اور اگر ان کے خلاف کوئی جرم ہو رہا ہے تو رپورٹ کریں۔انہوں نے یقین دلایا کہ خواتین کے خلاف جرائم میں ملوث افراد کے خلاف سخت قانونی کارروائی کی جائے گی۔