مزید خبریں

جاوید اقبال

 

مینڈھر//مینڈھر میں سرکاری راشن سٹوروں کی قلت کی وجہ سے عوام کو راشن کی قلت کا سامنا کرنا پڑرہا ہے ۔ریاستی انتظامیہ کی جانب سے پورے سب ڈویژن میں صرف 4سرکاری راشن سٹور قائم کئے گئے ہیں ۔ان راشن سٹوروں میں سے بلا ک بالاکوٹ میں 1مینڈھر میں 2اور منکوٹ میں 1سرکاری راشن سٹور قائم کیا گیا ہے ۔مقامی لوگوں نے الزام عائد کرتے ہوئے کہاکہ انتظامیہ کی عدم توجہی کی وجہ سے لوگوں کو شدید مشکلات کا سامنا کرنا پڑرہا ہے جبکہ اس سلسلہ میں متعدد بار انتظامیہ سے رجوع کیا گیا لیکن اس کے باوجود عوام کو سہولیات فراہم کرنے کیلئے سنجیدگی کا مظاہرہ نہیں کیا گیا ۔مقامی لوگوں نے کہاکہ اگر انتظامیہ کی جانب سے مینڈھر میں مزید سرکاری راشن قائم کئے جاتے تو غریب لوگ کسی بھی وقت ان سٹوروں سے راشن حاصل کر سکتے تھے لیکن انتظامیہ کی عدم توجہی کی وجہ سے پورے سب ڈویژن میںصرف چار ہی سرکاری سٹور قائم کئے گئے ہیں جن سے ہزاروں کی تعداد میں غریب لوگ راشن لیتے ہیں جبکہ باقی ہر ایک گائوں میں ڈیلر عوام کو راشن تقسیم کرتے ہیں جو کہ ہرایک ماہ میں صرف کچھ دنوں کیلئے راشن فروخت کرتے ہیں ۔مقامی لوگوں نے مانگ کرتے ہوئے کہاکہ مینڈھر میں مزید سرکاری راشن سٹور قائم کئے جائیں تاکہ غریب عوام کو سہولیات فراہم ہو سکیں ۔متعلقہ محکمہ کے مطابق سب ڈویژن میں 115سرکاری سٹور قائم کر نے کیلئے اعلیٰ حکام کو تحریر طورپر لکھا گیا تھا لیکن ابھی تک حکومت کی جانب سے مزید سٹور قائم کرنے کی منظوری نہیں ملی ۔

 

طارق شال

 

تھنہ منڈی //مغل شاہراہ کے متعلق اعلی سطحی اجلاس میں لئے گئے فیصلوں کا مغل روڈجوائنٹ ایکشن کمیٹی نے خیر مقدم کیا ہے۔مغل روڈ جوائنٹ ایکشن کمیٹی کے ممبران کا کہنا ہے انتظامیہ کی عدم توجہی کی وجہ سے مغل شاہراہ کو تعمیر کے بعد ابھی تک بنیادی سہولیات سے محروم رکھا گیا ہے ۔یہاں جاری ایک مشترکہ بیان میں مغل روڈ جو ائنٹ ایکشن کمیٹی کے عبدالرشید شال ،محمد صدیق گنائی ،رخسار احمد بٹ و دیگران نے کہا کہ مغل شاہراہ پر انتظامیہ کی جانب سے مواصلاتی نظام کے علا وہ طبی سہولیات ،بیت الخلاء ،کھانے پینے کے اشیاء ودیگر بنیادی سہولیات ہی فراہم نہیں کی گئی ہیں جس کی وجہ سے مسافروں ،سیاحوںاور عام راہگیروں کو شدید مشکلات کا سامنا کرنا پڑرہا تھا تاہم ریاستی انتظامیہ کی جانب سے دو ایمبو لینس ،طبی سہولیات بیت الخلاء کی تعمیر ،ورکشاپ ودیگر سہولیات فراہم کرنے کا فیصلہ خوش آئند ہے ۔انہوں نے ریاستی انتظامیہ سے اپیل کرتے ہوئے کہاکہ مغل شاہراہ پر ٹنل کی تعمیر کا جائزہ لیا جائے تاکہ مذکورہ شاہراہ کو پورا سال آمد و رفت کے قابل بنایا جائے۔

 

مینڈھر //سابق ممبر قانون سا زکونسل محمد رشید قریشی نے مینڈھر میں شیئر مارکیٹ کے نام پر کروڑوں روپے کی لوٹ کی غیر جانبدارانہ تحقیقات کرواکے اس میں ملوث افراد کے خلاف کڑی کارروائی کا مطالبہ کیاہے ۔ اپنے ایک بیان میں قریشی نے کہاکہ مینڈھر میں پولیس اور انتظامیہ کی ناک تلے کروڑوں روپے لوٹ لئے گئے اور فرضی شیئر مارکیٹ کے نام پر غریب لوگوں کی محنت کی کمائی سے بہت بڑی رقم جمع کی گئی ۔انہوں نے کہاکہ ایک گروپ منظم انداز میں کئی عرصہ تک کام کرتارہالیکن بدقسمتی سے پولیس اور انتظامیہ نے کوئی کارروائی نہیں کی اور اسے ایسا کرنے کی کھلی چھوٹ دی گئی ۔ قریشی نے کہاکہ ایسا لگتاہے کہ اس گروپ کو کسی کی پشت پناہ حاصل تھی اور پولیس معاملے کی غیر جانبدارانہ تحقیقات کرکے ملوثین کے خلاف سخت کارروائی کرے چاہے وہ کیوں نہ کتنا اثر ورسوخ رکھتے ہوں ۔ انہوں نے کہاکہ اگر اس گروہ کو سیاسی پشت پناہی حاصل رہی ہوتو اس پر بھی کارروائی ہونی چاہئے ۔قریشی کاکہناتھاکہ عوامی دبائو کے بعد پولیس نے اس سلسلے میں کیس تو درج کیاہے لیکن یہ کافی نہیں اور ملوثین کو کیفرکردار تک پہنچایاجاناچاہئے جنہوں نے غریب لوگوں کی محنت سے حاصل ہونے والی کمائی کو لوٹ لیا اور کروڑوں روپے جمع کرکے فرار کرگئے ۔انہوں نے کہاکہ ڈپٹی کمشنر پونچھ بھی اس معاملے کا سخت نوٹس لیں اور ذاتی طور پر تحقیقات کروائیں ۔

 

بختیار حسین

 

سرنکوٹ//بانڈی پور عصمت ریزی معاملہ کیخلاف سرنکوٹ میں جموں وکشمیر پیپلز موو منٹ کی جانب سے کینڈل مارچ نکالی گئی ۔اس موقعہ پر اراکین نے معصومہ کی عصمت ریزی کی شدید الفاظ میں مذمت کرتے ہوئے مانگ کی کہ ملوث افراد کیخلاف سخت سے سخت کارروائی عمل میں لائی جائے تاکہ آئندہ معاشرے میں ایسے کام دوبارہ سے نہ ہوسکیں ۔اس موقعہ پر بولتے ہوئے بار جنرل سیکریٹری سرنکوٹ ایڈوکیٹ عجاز خان نے انتظامیہ کو تنقید کا نشانہ بناتے ہوئے کہاکہ ملک میں ایسے معاملات کیخلاف سخت کارروائی کی ضرورت ہے تاہم انتظامیہ کی جانب سے غیر قانونی معاملات کو روکنے کیلئے غیر سنجیدگی کا مظاہرہ کیا جارہاہے ۔انہوں نے کہاکہ مذکورہ معاملہ میں ملوث فرد کو پھانسی دے کر معصومہ کو انصاف فراہم کیا جائے ۔اس دوران جموںوکشمیر پیپلز موومنٹ کے کو آر ڈینٹر ایڈو کیٹ موبین خان نے تشویش کا اظہار کرتے ہوئے کہاکہ مذکورہ معاملہ کے سلسلہ میں سخت سے سخت سزا دی جائے ۔اس موقعہ پر پارٹی کے ضلع کوآرڈینٹر ریدم پریت سنگھ ،تحصیل کنو نیئر ایڈ وکیٹ توصیف اکرم ودیگران بھی موجود تھے ۔

 

جاوید اقبال

 

مینڈھر//سب ڈویژن مینڈھر کے مختلف دیہاتوں میں مرکزی حکومت کی جانب سے صحت و صفائی کے سلسلہ میں شروع اسکیم سوچھ بھارت ابھیان کے تحت بیت الخلاء کی تعمیر ات عمل میں لائی گئی ۔تاہم مقامی لوگوں نے متعلقہ محکمہ پر الزام عائد کرتے ہوئے کہاکہ کئی علا قوں میں بیت الخلاء کی تعمیر عمل میں لانے کے بغیر ہی کئی افراد کے بینک کھاتوں میں پیسے ڈالے گئے ہیں ۔مقامی لوگوں نے الزام عائد کرتے ہوئے کہاکہ محکمہ دیہی ترقی کے ملازمین نے مبینہ طورپر بیت الخلاء کو تعمیر کئے بغیر اپنے رشتہ داروں کے کھاتوںمیں پیسے ڈالے گئے ہیں ۔جگال پنچایت کے مختار چوہدری اور عمران ارشاد نے بتایا کہ مذکورہ پنچایت میں اس وقت 90فیصد گھر ایسے ہیں جہاں پر بیت الخلاء کی تعمیر عمل میں ہی نہیں لائی گئی تاہم اس کے باوجود بھی ملازمین کی جانب سے مبینہ طورپر لاکھوں روپے ہڑپ لئے گئے ہیں ۔انہوں نے الزام عائد کر تے ہوئے کہاکہ کچھ ایک ملازمین نے اپنے رشتہ داروں کے کھاتوں میں پیسے ڈال کر بعد میں مذکورہ پیسے لینے کی کوشش بھی کی گئی ۔انہوں نے الزام عائد کرتے ہوئے کہاکہ ملازمین نے مذکورہ پنچایت کے مقامی افراد کے نام پر دیگر گائوں کے لوگوں کے کھاتوں میں بھی پیسے ڈالے گئے ہیں ۔مقامی لوگوں نے ریاستی انتظامیہ سے اپیل کرتے ہوئے کہاکہ مینڈھر میں ویجی لینس کی ایک ٹیم بھیجی جائے جو دیہی علا قوں میں تعمیر کردہ بیت الخلاء کے زمینی سطح پرہونے اور محکمہ دیہی ترقی کے ریکارڈ کا معائینہ کر ئے جبکہ اس سلسلہ میں غیر قانونی کاموں میں ملوث افراد کیخلاف کارروائی عمل میں لائی جائے ۔بلاک ڈیو لپمنٹ آفیسر مینڈھر نے کہاکہ کچھ علا قوں میں ابھی تک بیت الخلاء کی تعمیرنہیں کئے گئے ۔انہوں نے کہاکہ اگر کہیں شکایت ہو ئی تو اس کی تحقیقات کروائی جائے گی۔

 

عشرت حسین بٹ

 

منڈی//پی ڈی پی کی پونچھ اکائی کی طرف سے سابقہ ممبر اسمبلی شاہ محمد تانترے کی رہایش گاہ ایک تعزیتی اجلاس منعقد کیا گیا جس کے دوران سابقہ ممبراسمبلی بشیر احمد ناز کی وفات پر تعزیت کا اظہار کیا گیا ۔اس موقعہ پر بولتے ہوئے شاہ محمد تانترے نے چوہدری بشیر ناز کی وفات پر گہرے دکھ کا اظہار کرتے ہوئے کہاکہ مرحوم ایک شریف النفس انسان تھے جنہوں نے اپنی ساری زندگی غریب طبقہ کی فلاح و بہبود کیلئے وقف کر دی ۔پی ڈی پی لیڈر نے مرحوم کو اپنے بچپن کا دوست قرار دیتے ہوئے کہا کہ خطہ پیر پنچال ایک بہترین لیڈر سے محروم ہوچکا ہے ۔اجلاس میں شامل اراکین نے مرحوم کی وفات کے سلسلہ میں لواحقین کیساتھ ہمدردی کا اظہار کرتے ہوئے دعا مغفرت بھی کی۔

 

 

پرویز خان 

 

منجا کوٹ //زون منجا کوٹ کے کوئلی علا قہ میں قائم پرائمری سکول میں سٹاف کی قلت کی وجہ سے طلباء کو شدید مشکلات کا سامنا کرنا پڑتا ہے ۔جموں پونچھ شاہراہ سے دس کلو میٹر دور پہاڑی پر واقع مذکورہ پرائمری سکول میں اس وقت بچوں کو پڑھائی کیلئے صرف 1ٹیچر تعینات ہے ۔سکولی بچوں کو درپیش مسائل کے سلسلہ میں مذکورہ علا قہ کا ایک وفد زونل ایجوکیشن آفیسر منجا کوٹ سے ملا قی ہوا ۔وفد کے مطابق کو ئلی علا قہ میں 1994میں ایک پرائمری سکول قائم کر نے کو منظوری ملی تھی جبکہ اس کے بعد علا قہ کے بچوں کو تعلیم فراہم کرنا شروع کی گئی ۔انہوں نے کہاکہ اس وقت سکول میں 40بچے زیر تعلیم ہیں جبکہ ان کو تعلیم فراہم کر نے کیلئے صرف 1ہی ٹیچر تعینات کیا گیا ہے ۔وفد نے مانگ کر تے ہوئے کہاکہ مذکورہ پرائمری سکول میں معقول سٹاف تعینات کیا جائے تاکہ ان کے بچوں کو درپیش مسائل حل ہو سکیں ۔زونل ایجوکیشن آفیسر نے وفد کو یقین دلاتے ہو ئے کہاکہ معاملہ چیف ایجوکیشن آفیسر راجوری کے نوٹس میں لایا جائے گا ۔اس وفد میں فاروق حسین ،عبدالعزیز ،حاکم دین ،محمد لطیف اور شیراز حسین کے علا وہ دیگران بھی مو جود تھے ۔