عظمیٰ نیوز سروس
جموں//الیکشن کمیشن آف انڈیانے جموں و کشمیر میں 18 ویں لوک سبھا کے انتخابات کے کامیاب انعقاد کے لیے چیف سکریٹری اتل ڈلو کی خدمات کو تسلیم کیا ہے۔چیف سکریٹری، جموں و کشمیر کو 18ویں لوک سبھا انتخابات-2024کے کامیاب انعقاد کے لیے ان کی بہترین خدمات کے لیے چیف الیکشن کمشنر اور دو الیکشن کمشنروں کے دستخط شدہ ایک ’مثالی قیادت کا سرٹیفکیٹ‘ پیش کیا گیا۔کمیشن کی طرف سے یہ تعریف چیف سکریٹری نے یوٹی میں پریشانی سے پاک انتخابات کے انعقاد کے لئے حاصل کی جس میں یوٹی کے تمام اضلاع میں 1989کے بعد یہاں منعقدہ عام انتخابات کے لئے پہلی بار 58.11فیصد پولنگ ریکارڈ کی گئی۔ یہ 2019کے انتخابات کے مقابلے میں 14فیصدسے زیادہ تھا جس کے دوران یوٹی کے اضلاع میں پولنگ کا مجموعی فیصد صرف 44فیصدکے قریب تھا۔یہاں یہ بتانا ضروری ہے کہ سال 2019میں اس کی تنظیم نو کے بعد یہ جموں و کشمیر کے پہلے عام انتخابات تھے۔ ان انتخابات میں کل 87,26,281ووٹر اپنا حق رائے دہی استعمال کرنے کے اہل تھے۔ اس مقصد کے لیے 11,629پولنگ اسٹیشن قائم کیے گئے تھے اور 80,724پولنگ اہلکاروں کو تربیت دی گئی تھی اور انہیں جموں و کشمیر کے گاؤں اور قصبوں میں انتخابات کے انعقاد کے لیے ای سی آئی کو دستیاب کرایا گیا تھا۔مزید یہ کہ پہلی بار انتظامیہ نے جموں و کشمیر کے تمام اضلاع میں مخصوص موضوعات کے تحت 83خواتین مرد، 70جوان مرد، 73پی ڈبلیو ڈی، 88گرین پولنگ سٹیشن، 180بارڈر پولنگ سٹیشن، 152ماڈل پولنگ سٹیشن اور 46منفرد پولنگ سٹیشن قائم کیے۔ان کا مقصد معاشرے کے تمام طبقات کی رسائی اور نمائندگی کو یقینی بنا کر انتخابی عمل میں انقلاب لانا تھا۔خواتین، نوجوانوں اور معذور افراد پر خصوصی توجہ کے ساتھ ان اسٹیشنوں کو ان کی منفرد ضروریات کو پورا کرنے کے لیے تیار کردہ سہولیات سے آراستہ کیا گیا تھا، جس سے جمہوری عمل میں ان کی فعال شرکت کے لیے سازگار ماحول کو فروغ دیا گیا تھا۔
