یو این آئی
غزہ// غزہ میں گزشتہ 24 گھنٹوں کے دوران اسرائیلی فوج کی بمباری سے مزید 37 فلسطینی جاں بحق ہوگئے ۔غیر ملکی میڈیا کے مطابق اسرائیلی فوج کی جانب سے کمال عدوان اسپتال پر دوبارہ حملہ کیا گیا جب کہ شمالی غزہ میں اسرائیلی فوج کا محاصرہ جاری ہے اور فلسطینیوں کو وارننگ بھی جاری کردی گئی ہے ۔رپورٹس میں بتایا گیا ہے کہ اسرائیلی فوج نے غزہ سٹی میں ڈرون حملہ کرکے 2 فلسطینی ہلاک کردیے جب کہ غزہ میں امدادی سرگرمیاں معطل ہیں۔فلسطینی اتھارٹی کے زیر انتظام مغربی کنارے پر اسرائیلی آباد کاروں کے حملے جاری ہیں جہاں متعدد فلسطینیوں کے گھراورگاڑیاں جلادی گئیں۔علاوہ ازیں اسرائیلی فوج نے لبنان میں ایک ہی دن میں 16 شہریوں کو ہلاک اور 90 کو زخمی کردیا۔اسرائیلی علاقے بنیامن میں چیک پوسٹ پرحملہ کیا گیا جس کے نتیجے میں دو خواتین فوجی اہلکار زخمی ہوگئیں۔
اسرائیل کا دمشق پرحملوں کا دعوی
دمشق/یو این آئی/ اسرائیل نے دعوی کیا ہے کہ اس نے شام کے دارالحکومت دمشق پر فضائی حملہ کیا ہے ۔شامی حکومت کی خبر رساں ایجنسی سانا کی خبر کے مطابق، کل مقامی وقت کے مطابق شام 6:05 بجے اسرائیل نے دمشق کے جنوب میں کئی مقامات کو فضائی حملوں کا نشانہ بنایا۔خبر میں کہا گیا کہ ہماری فضائی دفاعی نظام نے گولان کی پہاڑیوں کی جانب سے آنے والے دشمن کے زیادہ تر میزائلوں کو مار گرایا۔اس حملے میں صرف ما لی نقصان ہوا ہے دوسری جانب، اسرائیل کی طرف سے حملے کے حوالے سے کوئی بیان جاری نہیں کیا گیا۔ واضح رہے کہ اسرائیل 2011 میں خانہ جنگی کے آغاز سے ہی شام میں وقتاً فوقتاً ایرانی نواز گروپوں اور شامی فوج کے فوجی ٹھکانوں پر حملے کرتا رہا ہے ۔
اسرائیل نے تمام تجاویزمسترد کر دیں:نجیب میقاتی
بیروت/یو این آئی/ لبنان کے وزیر اعظم نجیب میقاتی نے کہا ہے کہ اسرائیل نے جنگ بندی کی تمام تجاویز مسترد کر دی ہیں۔وزیر اعظم کے دفتر کے مطابق، نجیب میقاتی نے بین الاقوامی برادری پر اسرائیل کو روکنے میں ناکامی پر تنقید کی۔میقاتی نے کہا کہ اسرائیل نے جنگ بندی کی تمام تجاویز مسترد کر دیں، جنگی جرائم میں اضافہ کیا یہاں تک کہ تاریخی مقامات کو بھی نشانہ بنایا۔میقاتی نے کہا کہ حکومت نے فوج کو 1500 نئے اہلکاروں سے مضبوط کرنے کا فیصلہ کیا ہے اور کابینہ اجلاس میں مزید اقدامات پر غور کیا جائے گا۔انہوں نے بتایا کہ وزارت صحت نے اسرائیلی فضائی حملوں کی وجہ سے صحت کے شعبے میں ہونے والی تباہی کی تفصیلی رپورٹ سلامتی کونسل کے پانچ مستقل ارکان اور یورپی یونین کے ممالک کے سفیروں کو پیش کی۔میقاتی نے لبنان کے مشرقی شہر بعلبک اور جنوبی شہر صور میں ثقافتی و تاریخی مقامات کو نقصان پہنچنے پر شدید تشویش کا اظہار کرتے ہوئے سلامتی کونسل کو درج ذیل الفاظ میں کارروائی کرنے کی دعوت دی ہے ان تاریخی خزانوں کے تحفظ کے لیے فوری اور قطعی اقدامات کیے جانے چاہئیں جو نہ صرف ہماری قومی شناخت کا حصہ ہیں بلکہ عالمی تاریخ کے لیے بھی اہمیت رکھتے ہیں۔
