سری نگر// جموں کشمیر کے گرمائی دارلخلافہ سری نگر کے نٹی پورہ بڈ شاہ نگر علاقے میں شبانہ آگ کی واردات کے دوران تجارتی عمارت خاکستر ہوئی ہے جس میں لاکھوں روپیہ مالیت کا بجلی سامان تباہ و برباد ہوا ۔
سرکاری ذرائع نے بتایا کہ یکم اور 2 جنوری کی درمیانی رات کو بڈ شاہ نگر نٹی پورہ علاقے میں تین منزلہ تجارتی عمارت سے آگ کے شعلے بلند ہوئے۔
انہوں نے کہا کہ فائر اینڈ ایمرجنسی کے اہلکار فوری طورپر جائے واردات پر پہنچے اور آگ بجھانے کی کارروائی شروع کی تاہم آتشزدگی کی اس واردات میں لاکھوں روپیہ مالیت کا الیکٹرانک اور دوسرا سامان راکھ کے ڈھیر میں تبدیل ہوا۔
فائر اینڈ ایمرجنسی کے ایک سینئر عہدیدار نے یو این آئی اردو کو بتایا کہ آگ نمودار ہونے کی اطلاع ملتے ہی مختلف فائر اسٹیشنوں سے فائر ٹینڈر جائے وقوع پر پہنچے ۔
اُن کے مطابق انتھک کوشش کے بعد آگ کی اس واردات پر قابو پایا گیا ہے۔
پولیس نے آگ لگنے کی وجوہات جاننے کی خاطر کیس درج کرکے مزید تحقیقات شروع کی ہے۔
