عظمیٰ نیوز سروس
سرینگر// شہری ہوابازی کے مرکزی وزیر رام موہن نائیڈو کنجراپو نے اتوار کو ہندوستان بھر کے ہوائی اڈوں پر مسافروں پر مرکوز سہولیات کا عملی طور پر افتتاح کیا، جس میں سرینگر ہوائی اڈے میں کلیدی بہتری بھی شامل ہے۔حکام نے بتایا کہ سرینگر ہوائی اڈے پر، سیکورٹی ہولڈ ایریا میں اضافی 650 مربع میٹر پر مشتمل توسیعی ٹرمینل کا علاقہ شامل ہے، جس کا مقصد بھیڑ کو کم کرنا اور مسافروں کی سہولت کو بڑھانا ہے۔وزیر نے کئی جدید سہولیات کا بھی آغاز کیا، جن میں بغیر کسی رکاوٹ کے DigiYatra خدمات، چار گھنٹے تک مفت وائی فائی تک رسائی، اور مسافروں کو پڑھنے کا ایک بھرپور تجربہ فراہم کرنے کے لیے Flybrary پہل شامل ہے۔یہ پیش رفت ہوائی اڈوں کو جدید بنانے اور مسافروں کے مجموعی تجربے کو بہتر بنانے کے لیے شہری ہوا بازی کی وزارت اور ایئرپورٹس اتھارٹی آف انڈیا کی جاری کوششوں کا حصہ ہیں۔یہ بات قابل ذکر ہے کہ مرکزی شہری ہوابازی نے یکم اپریل سے 31جولائی تک پروازوں کی آمد و روانگی میں کمی کا اعلان کیا ہے۔فی الوقت سرینگر ہوائی اڈے پر 30 پروازوں کی آمد اور روانگی ہوتی ہے۔ توسیع منصوبے کی وجہ سے پروازوں کی تعداد دن میں صرف 15رہ جائے گی۔
