سرینگر//اے آئی پی سربراہ نے سرکار کی طرف سے 29ستمبر کو مبینہ طور سے پاکستان کے خلاف کی جانے والی سرجیکل اسٹرایئکوں کی سالگرہ کے موقعہ پر اسکولوں میں تقاریب منعقد کرانے اور پھر ان تقاریب کی ویڈیو گرافی کرکے اسے اعلیٰ حکام تک بھیجنے کے احکامات جاری کئے جانے کو افسوسناک قرار دیتے ہوئے الزام لگایا ہے کہ نئی دلی کشمیر کو تجربہ گاہ کے طور استعمال کر رہی ہے جو کہ قابل مذمت ہے۔ انجینئر رشید نے اپنے ایک بیان میں کہا ’’گذشتہ تیس برسوں سے تشدد کی چکی میں پسے جا رہے کشمیریوں کو صرف اور صرف امن کی ضرورت ہے اور انہیں تشدد کے واقعات اور جنگی مشقوں کو لیکر جشن منانے والے نہ صرف تنگ نظر ہیں بلکہ حقائق سے کوسوں دور ہیں ۔ بہتر رہتا اگر آج مرکزی سرکار ان سرجیکل اسٹرائیکوں کی سالگرہ کے موقعہ پر سرحدی علاقوں کے اُن لوگوں کیلئے جن کی زندگیاں ان روز روز کے ہنگاموں کی وجہ سے اجیرن بن چکی ہیں جامع ترقیاتی اور دیگر پیکیجوں کا اعلان کرتی لیکن سرحدوں سے ہزاروں میل دور شیش محلوں میں رہنے والے حکمران مظلوم کشمیریوں سے اس بات کا جشن منوانا چاہتے ہیں جس نے اُن کی جوانیاں ، اُن کے بیٹے اور اُن کا سکون چھینا ہے ۔ پوچھا جا سکتا ہے کہ اگر خود ہندوستانی فوج اور بی ایس ایف کے اعلیٰ افسران اس بات کا اعتراف کرتے ہیں کہ پاکستان اُن کے بقول جنگجوئوں کو کشمیر بھیج رہا ہے اور سرحد کے اُس پار عسکریت پسندوں کے تربیتی کیمپ کام کر رہے ہیں تو پھر کیا یہ بات ثابت نہیں ہوتی کہ یہ سرجیکل اسٹرائیکس کوئی بھی ہدف حاصل کرنے میں ناکام ہوئی ہیں۔ کشمیر کے لوگ ہرگز اس بات پر خوش نہیں کہ اُن کی سرزمین کو بارود اور گولیوں کا مسکن بنایا جائے اور چپے چپے پر انسانوں کا خون گرے۔ یہ بات بھی کسی سے پوشیدہ نہیں کہ گذشتہ تیس برسوں سے اہل کشمیر نے جو مصیبتیں دیکھی ہیں اس سے نہ صرف اُن کی ذہنی حالت مفلوج ہو گئی ہے بلکہ ان کا سارا سکون لُٹ چکا ہے اور ایسے میں انہیں تشدد سے متعلق واقعات کا جشن منانے کا مطالبہ کرنا ایسا ہی ہے جیسے کہ کسی کی عصمت لٹنے کے بعد اسے ناچنے کیلئے کہا جائے‘‘۔ انجینئر رشید نے یا د دلایا کہ ہر بار سرکار اور ہندوستانی میڈیا اہل کشمیر خاص طور سے مزاحمتی قیادت پر الزام لگاتے آئے ہیں کہ انہوں نے تعلیم کو سیاست زدہ کر دیا ہے اور مذاق کی بات تو یہ ہے کہ اب خود نئی دلی اپنے حقیر مفادات کیلئے خود وہی کچھ کر رہی ہے ۔ انہوں نے اس بات کو دہرایا کہ ہند پاک دشمنی کا سب سے زیادہ خمیازہ اہل کشمیر کو ہی اٹھانا پڑتا ہے لہذا لازمی ہے کہ نئی دلی خیالی جنتوں میں رہنے کے بجائے حقیقت پسندی سے کام لیکر رائے شماری کے ذریعے کشمیر مسئلہ کے حل کیلئے سامنے آئے اور سرجیکل اسٹرائیکس کے نام پر ہندوستانی لوگوں کو گمراہ کرنا چھوڑ دے۔
سرجیکل اسٹرایئک سالگرہ
