عظمیٰ نیوز ڈیسک
نئی دہلی//ریلوے ملازمین کو سنگین بیماری کی صورت میں ایمرجنسی علاج کیلئے اب پرائیویٹ ہسپتالوں میں مفت علاج مل سکے گا۔ ریلوے نے 13پرائیویٹ ہسپتالوں کے ساتھ معاہدہ کیا ہے جس کا فائدہ ریلوے اہلکاروں کو مشکل وقت میں ملے گا۔ میڈیا رپورٹس کے مطابق ریل ملازمین ریلوے کے پینل میں شامل پرائیویٹ اسپتال میں امید کارڈ کی بنیاد پر داخل ہو سکیں گے۔ انھیں ریلوے اسپتال پہنچ کر ریفر کرانے کی ضرورت نہیں پڑے گی۔بتایا جاتا ہے کہ معاہدہ کے مطابق اگر کسی ریل ملازمین کو فوری علاج کی ضرورت پڑتی ہے تو پرائیویٹ اسپتال 24 گھنٹے میں ریلوے ہسپتال کو آن لائن ایمرجنسی ریفر لیٹر بھیجے گا۔ ریلوے ہسپتال کی منظوری کے بعد پرائیویٹ ہسپتال میں مفت علاج ضرورت کے مطابق جاری رہے گا۔ حالانکہ یہ سہولت ایمرجنسی کی حالت میں ہی ملے گی۔ عام حالات میں ریلوے اسپتال سے منتخب پرائیویٹ اسپتال کے لیے ریفر کرانے کا طریقہ ہی اختیار کرنا ہوگا۔للت نارائن مشر سنٹرل ریلوے اسپتال (ایل این ایم) نے 13 پرائیویٹ اسپتالوں کے ساتھ یہ معاہدہ جاری رکھنے کا فیصلہ کیا ہے۔ ایل این ایم انتظامیہ نے میدانتا، دی میڈیسٹی سیکٹری-38 (گڑگاوں) کے ساتھ 30 ستمبر 2025 تک کیش لیس علاج کے لیے معاہدہ کر لیا ہے۔ جنرل منیجر سومیا ماتھر سے منظوری کے بعد میڈیکل ڈائریکٹر ڈاکٹر محمد اصغر علی خان نے لکھنو، وارانسی، عزت نگر اور گونڈا کے چیف میڈیکل سپرنٹنڈنٹ کو میدانتا میں ریفر کرنے کے لیے گائیڈلائن بھی جاری کر دیا ہے۔ریلوے کے پینل میں شامل پرائیویٹ ہسپتالوں کی فہرست میںمیدانتانئی دہلی ،یشودا ہاسپیٹل اینڈ ریسرچ سنٹر، غازی آباد،سروودے ہاسپیٹل اینڈ ریسرچ سنٹر، فرید آباد،فورٹس اسکارٹ ہارٹ انسٹی ٹیوٹ اینڈ ریسرچ سنٹر، نئی دہلی،وجیٹک آئی سنٹر نئی دہلی،بترا ہاسپیٹل اینڈ ریسرچ سنٹر، نئی دہلی،نیو پرکاش کلینک، نزد کوا باغ پولیس چوکی، گورکھپور، رام جانکی نیترالیہ، اے ڈی چوک، جبلی روڈ، گورکھپور،فاطمہ ہاسپیٹل، پادری بازار، گورکھپور،سری سائیں نیترالیہ، 10 نمبر بورنگ سونولی روڈ، گورکھپور،نیو اودے ہاسپیٹل، گول گھر، گورکھپوراورساوتری ہاسپیٹل گورکھپورشامل ہیں۔
