رسوئی گیس کی قیمتوں میں بے پناہ اضافہ

 تھنہ منڈی // سب ڈویژن تھنہ منڈی کی عوام کو تیل خاکی اور چینی کی عدم دستیابی سے کئی طرح کی مشکلات میں مبتلا ہونے کیساتھ ساتھ رسوئی گیس کی قیمتوں میں ہوئے اضافے کی وجہ سے بھی شدید پریشان ہے ۔عوام نے محکمہ امور صارفین و عوامی تقسیم کاری سے مطالبہ کیا ہے کہ وہ سب ڈویژن میں تیل خاکی کے ساتھ ساتھ اشیاء￿  خورد و نوش کی وافر مقدار کو یقینی بنائے۔ اس موقع پر حافظ محمد نصیر الدین نقشبندی نے کہاکہ انتظامیہ کی جانب سے تیل خاکی کو بغیر کسی وجہ کے بند کر دیا گیا ہے جس کی وجہ سے ان کی مشکلات میں اضافہ ہو چکا ہے۔انہوں نے بتایا کہ بجلی کی معیاری سپلائی بھی فراہم نہیں کی جارہی ہے اور رسوئی گیس میں بے پناہ اضافے کے باعث عوام  خاص کر مزدور طبقہ کو کئی طرح کی پریشانیوں کا سامنا ہے جبکہ خراب موسم کے دوران ہی گورنمنٹ کی جانب سے تیل خاکی کی سپلائی کو نامعلوم وجوہات کی بنا پر بند کر دیا گیا ہے جو کہ انتہائی افسوس ناک بات ہے۔ ان کا کہنا تھا کہ پہاڑی علاقوں کے اکثر لوگ تیل خاکی پر ہی انحصار کرتے تھے لیکن اس کی سپلائی بند ہونے سے اب لوگ گھپ اندھیرے میں زندگی بسر کرنے پر مجبور ہیں۔اے اے وائی زمرے سے تعلق رکھنے والے صارفین نے کشمیر عظمیٰ کو بتایا کہ محکمہ امور صارفین کی جانب سے ان کو نظراندز کیا جارہا ہے۔انہوں نے مانگ کرتے ہوئے کہاکہ جلد ازجلد تیل خاکی اور چینی کی سپلائی کو بحال کیا جائے تاکہ غریب عوام اس پریشانی سے نجات حاصل ہو سکے۔۔