راجوری// جموں ۔پونچھ شاہراہ پر ناریاں کے مقام ایک ماروتی کار حادثے کاشکار ہوگئی جس کے نتیجہ میں ڈپٹی کمشنر راجوری کے پرسنل اسسٹنٹ سمیت خاندان کے 7افراد لقمہ اجل بن گئے ۔گاڑی زیر نمبر JK11B-4300جموں سے راجوری کی طرف آرہی تھی جس دوران وہ ڈرائیور کے قابو سے باہر ہوکر مناور دریا میں جاگری جس کی وجہ سے اس میں سوار سبھی افراد لقمہ اجل بن گئے ۔پانچ افراد کی موت موقعہ پر ہی ہوگئی جبکہ دو بچوں کو ہسپتال لیجارہے تھے جب انہوںنے دم توڑ دیا۔حادثے میں مرنے والے افراد کی شناخت محمود احمد مغل ولدجعفر علی پرسنل اسسٹنٹ ڈپٹی کمشنر راجوری ، عبدالعزیز ولد جعفر علی ، اطہر بیگم دختر جعفر علی ،جمیلہ زوجہ محمود احمد ، ریحان ولد محمود احمد ،حسین ولد محمود احمد، علیشا دختر محمود احمد ساکنان گھمبیر مغلاں راجوری کے طور پر ہوئی ہے جن سبھی کا ایک ہی خاندان سے تعلق تھا ۔ حادثے کی خبر ملتے ہی بڑی تعداد میں لوگ موقعہ پرپہنچے اور انہوںنے تمام نعشوں کو وہاںسے اٹھاکرہسپتال پہنچایا۔ جائے حادثہ پر ڈپٹی کمشنرراجوری شائد اقبال چودھری ، ایس ایس پی راجوری یوگل منہاس سمیت ڈاکٹروں کی ایک ٹیم بھی پہنچ گئی ۔ بعد میںنعشوں کو آخری رسومات کے لئے ان کے آبائی گاؤں گمبھیر مغلاں روانہ کردیا گیاہے ۔ وزیرا علیٰ محبوبہ مفتی نے ضلع راجوری کے چنگس علاقہ میں آئے سڑک حادثہ میں سات افراد کے جان بحق ہونے پر اپنے رنج و غم کا اظہار کیا ہے۔اپنے ایک تعزیتی پیغا م میں وزیر اعلیٰ نے سات قیمتی جانیںتلف ہونے کوافسوس ناک قرار دیا۔انہوں نے کہا کہ پہاڑی علاقوں میں روز بروز سڑک حادثات میں اضافہ درج کیا جارہا ہے اور اس افسوس ناک صورتحال کو مد نظر رکھتے ہوئے مسافروں کی حفاظت کو یقینی بنانے کے لئے اقدامات کرنے ہوں گے۔انہوں نے کہا کہ ساتھ میں سڑکوں کی دیکھ ریکھ، گاڑیوں کی حالت سدھارنے اور دیگر پیرا میٹرس کی طرف خصوصی توجہ دینے کی ضرورت ہے۔محبوبہ مفتی نے غمزدہ کنبوں کے ساتھ ہمدردی کا اظہار کیا اور مرحومین کی ارواح کے ابدی سکون کے لئے دُعا کی۔نائب وزیرا علیٰ ڈاکٹر نرمل سنگھ نے ضلع راجوری کے چنگس علاقے میں پیش آئے سڑک حادثہ میں سات افراد کے جان بحق ہونے پر گہرے رنج و غم کا اظہار کیا ہے۔غمزدہ کنبوں کے ساتھ ہمدردی کا اظہار کرتے ہوئے انہوں نے ضلع انتظامیہ سے کہا کہ وہ فوری بچاؤ کاروائیاں عمل میں لائیں اور زخمیوں کو طبی امداد فراہم کریں۔
راجوری میں حادثہ ،ایک ہی خاندان کے 7 افراد لقمہ اجل
