دسویں کے نتائج میں خراب کارکردگی کی بنا پرسرینگر میں 3 ہیڈ ماسٹر، 8 ٹیچر معطل

سرینگر/چیف ایجو کیشن آفیسر سرینگر نے منگل کو تین ہیڈ ماسٹروں اور آٹھ اساتذہ کو دسویں جماعت کے حالیہ نتائج میں ناقص کارکردگی کی بنا پر معطل کردیا۔

مذکورہ اساتذہ کی معطلی کے احکامات ڈائریکٹر سکول ایجو کیشن کشمیر، جی این ایتو کی ہدایات پر جاری کئے گئے ہیں۔

معطل ہونے والوں میں گورنمنٹ بائز ہائی سکول نوہٹہ کے ہیڈ ماسٹر،بائز ہائی سکول نیو تھید کے ہیڈ ماسٹر اور بائز ہائی سکول سعدہ پورہ کے ہیڈ ماسٹر شامل ہیں۔

نوہٹہ ہائی سکول میں تعینات سوشل سٹیڈیز اور سائنس کے استاتذہ بھی معطل شدگان میں شامل ہیں۔

جیسا کہ پہلے ہی رپورٹ کیا گیا ہے کہ گورنمنٹ بائزہائی سکول نوہٹہ سے صرف ایک اُمیدوار امتحان میں شامل ہوا تھا جو ناکام رہا۔

بائز ہائی سکول رعناواری میں تعینات دو سائنس اُساتذہ اور بائز سکول پادشاہی باغ کے ایک استاد بھی معطل شدگان میں شامل ہیں۔

بائز ہائی سکول نیوتھید میں تعینات دو سوشل سائنس اساتذہ کو بھی معطل کیا گیا ہے۔

معطلی حکمنامے کے مطابق ناقص کارکردگی دکھانے والے سکولوں کے ہیڈ ماسٹروں کو ہدایت دی گئی ہے کہ ناکام اُمیدواروں کیلئے خصوصی کلاسوں کا اہتمام کریں۔ان کلاسوں میں طالب علموں کو پڑھانے کی ذمہ داری معطل شدہ اساتذہ پر ڈالی گئی ہے۔ مذکورہ کلاسوں کا انتظام ناقص کارکردگی دکھانے والے اُساتذہ پر ہی ڈالی گئی ہے۔