ہیملٹن//اسنیہ رانا (30 رن پر 4 وکٹ) کی خطرناک گیندبازی کی بدولت ہندوستانی خواتین کرکٹ ٹیم نے یہاں منگل کو آئی سی سی 2022 خواتین ورلڈ کپ کے میچ میں بنگلہ دیش کو یکطرفہ انداز میں 110 رنز سے شکست دی۔ دفاعی رنر اپ ہندوستان نے ٹاس جیت کر پہلے بلے بازی کرنے کا فیصلہ کیا، یاستیکا بھاٹیہ، شیفالی ورما اور اسمرتی مندھانا کی شاندار اننگز کی بدولت، انہوں نے 50 اوورز میں سات وکٹوں پر 229 رنز کا چینلجنگ اسکوربنایا۔ بعد ازاں اسنیہ رانا، جھولن گوسوامی اور پوجا وستراکر کی خطرناک گیندبازی کی بدولت نے بنگلہ دیش کو 40.3 اوورز میں 119 رنز پر آؤٹ کر دیا۔ یاستیکا نے دو چوکوں کی مدد سے 80 گیندوں پر 50 رنز بنائے جبکہ شیفالی نے چھ چوکوں اور ایک چھکا کی مدد سے 42 گیندوں پر 42 اور اسمرتی نے 51 گیندوں پر تین چوکوں کی مدد سے 30 رنزکاتعاون دیا۔ یاستیکا کو میچ وننگ نصف سنچری کے لیے 'پلیئر آف دی میچ' قرار دیا گیا۔ اس کے ساتھ ہی اسنیہ نے 10 اوور میں 30 رن دے کر سب سے زیادہ چار وکٹ لئے۔ ان کے علاوہ جھولن اور پوجا نے دو دو، جبکہ راجیشوری گائیکواڑ اور پونم یادو نے ایک ایک وکٹ لیا۔ بنگلہ دیش کی جانب سے سلمیٰ خاتون نے 35 گیندوں میں چار چوکوں کی مدد سے 32 رنز بنائے۔ ساتھ ہی ریتو مونی نے 10 اوور میں 37 رن دے کر سب سے زیادہ تین وکٹ لیے۔ ناہیدہ اختر نے بھی دو وکٹیں حاصل کیں۔ قابل ذکر ہے کہ ٹورنامنٹ میں ہندوستان کی یہ تیسری جیت ہے اور اس جیت کے ساتھ ہی اس کا پلے آف کے لیے کوالیفائی کرنے کا دعویٰ مضبوط ہو گیا ہے۔ ہندستان اب چھ میچوں میں تین جیت اور تین ہار کے ساتھ چھ پوائنٹس لے کرپوائنٹس ٹیبل پر تیسرے نمبر پر ہے۔ دوسری جانب بنگلہ دیش کی یہ چوتھی شکست ہے اور وہ ٹورنامنٹ سے تقریباً باہر ہے۔ اس کے پانچ میچوں میں ایک جیت کے ساتھ دو پوائنٹس ہیں اور وہ پوائنٹس ٹیبل میں ساتویں نمبر پرہے۔ یواین آئی
خواتین کرکٹ ورلڈ کپ | ہندوستان کی بنگلہ دیش پر 110 رنوں سے بڑی جیت
