جے ڈی اے جموں کے امن کےلئے خطرہ ،انہدامی کارروائی فرقہ پرستی :جاویدرانا

مینڈھر//نیشنل کانفرنس کے سینئرلیڈر اورسابق ممبراسمبلی مینڈھرجاویداحمدرانانے کہاہے کہ ریاست کے لوگ تقسیم کی سیاست کرنے والی طاقتوں کومستردکرکے نیشنل کانفرنس کاانتخاب کرکے پھرسے اقتدارمیں لائیں گے۔جاویداحمدرانانے ان خیالا ت کااظہار مینڈھرکے علاقہ گورسائی میں منعقدہ ایک عوامی میٹنگ کے دوران کیا۔انہوں نے کہاکہ ریاست کے لوگوں کویہ احساس ہوچکاہے کہ نیشنل کانفرنس کوپھرسے اقتدارمیں لاناکس قدرضروری ہوچکاہے۔ جاویداحمدرانانے جموں ڈیولپمنٹ اتھارٹی کی سرکاری اراضی چھڑانے کےلئے شروع کی گئی انہدامی مہم کویکطرفہ اورمخصوص طبقے کوہراساں کرنے کی سازش سے تعبیرکیا۔ انہوں نے کہاکہ حیرت کی بات ہے کہ علی الصبح جے ڈی اے اہلکاران نے نکی توی اوربیلی چرانامیں انہدامی کاروائی چلاکرمسلم بستیوں پریلغارکی ۔انہوں نے کہاکہ جموں میں 21 کالونیاں ہیں جن میں سے صرف ایک ہی کالونی ریگولرائزہے لیکن افسوس کی بات ہے کہ صرف مسلم بستیوں سے غریب مسلمانوں کے مکانات کوانہدامی کاروائی کی زدمیں لایاجارہاہے۔انہوں نے کہاکہ جے ڈی اے حکام فرقہ پرستی پرمبنی کاروائی چلارہاہے جوکہ قابل مذمت ہے۔انہوں نے کہاکہ صرف ایک ہی فرقے کے لوگوں کونشانہ بنانافرقہ پرستی ہے ۔جاویدرانانے کہاکہ جہاں پردہائیوں سے خانہ بدوش آبادہیں ان کالونیوں کوریگولرائزکیوں نہیں کیاجارہاہے جس سے جے ڈی اے کی منشاظاہرہوجاتی ہے۔انہوں نے کہاکہ جے ڈی اے کی کاروائی صرف غریب اورمخصوص طبقے کے لوگوں کے خلاف ہوتی ہے جس سے فرقہ پرستی کی بوآتی ہے۔انہوں نے انتباہ دیاکہ خانہ بدوشوں کے خلاف جے ڈی اے کے مظالم کوبرداشت نہیں کیاجائے گا۔انہوں نے کہاکہ ہم غریب اورخانہ بدوشوں کے ساتھ کھڑے ہیں اوران کے مکانات کوگرانے کی ہرگزاجازت نہیں دی جائے گی۔انہوں نے کہاکہ اگرنیشنل کانفرنس اکثریت سے ریاست میں اقتدارمیں آئے گی توہم خانہ بدوشوں کی کالونیوں کوریگولرائزکرائیں گے ۔ انہوں نے کہاکہ زعفرانی برگیڈکے اشاروں پرمعصوم لوگوں کی ہراسانی ناقابل قبول ہے۔انہوں نے ریاستی گورنرستیہ پال ملک سے مطالبہ کیاکہ وہ ان جے ڈی اے افسران کوتبدیل کریںاورایسے افسران کوتعینات کریں جوفرقہ پرست نہ ہوں۔انہوں نے کہاکہ جے ڈی اے جموں کے پرامن ماحول کےلئے خطرہ ہے ۔ انہوں نے کہاکہ جے ڈی اے ایسٹ انڈیاکمپنی کے نقش وقدم کی پیروی کررہی ہے اورکسی کی بات نہیں سن رہی ہے۔علاوہ ازیں جاویدرانا نے کہاکہ گزشتہ چارسالوں سے ریاست کے لوگ نامساعدحالات اورتباہی جھیل رہے ہیں۔انہوں نے کہاکہ ریاست کے حالات کومعمول پرلانے کےلئے نیشنل کانفرنس کواقتدارمیں واپس لاناناگزیرہے۔انہوں نے کہاکہ اس میں کوئی شک نہیں کہ نیشنل کانفرنس ریاست کامستقبل ہے ۔انہوں نے کہاکہ نیشنل کانفرنس ریاست میں آٹانومی کی بحالی ملک کے آئین کے تحت چاہتی ہے۔انہوں نے کہاکہ دفعہ 370 کاتحفظ کرنے کےلئے نیشنل کانفرنس تقسیم کی سیاست کرنے والی طاقتوں کے خلاف مسلسل جدوجہدکررہی ہے۔انہوں نے کہاکہ نیشنل کانفرنس ریاستی عوام کے لوگوں کے مفادات کوتحفظ فراہم کرنے کےلئے سنجیدہ کام کررہی ہے۔رانانے کہاکہ پی ڈی پی کونیشنل کانفرنس کوختم کرنے کےلئے بنایاگیاتھالیکن یہ جماعت خودہی ختم ہوگئی اوراس کے درجنوں بڑے لیڈراورہزاروں ورکرپارٹی چھوڑچکے ہیں اوربہت سے موقعے کی تاک میں ہیں۔اس موقعہ پر ایڈوکیٹ نذیرحسین صوبائی نائب صدر،حاجی رشید،ضلع صدرایس ٹی سیل، شیرازاظہری ، سینئرنیشنل کانفرنس لیڈر باجی میاں فاروق بلاک صدرتنویرخان، بلاک صدرحاجی نذیرحسین،سرپنچ چوہدری بشیر، سرپنچ منیرشاہ ،بشیربجاڑ، مشتاق چوہدری اورنصیرخان نے بھی خیالات کااظہارکیا۔