جے اینڈ کے بینک کے ڈیجیٹل کلینڈر کی نقاب کشائی

سری نگر//جے اینڈ کے بینک کے منیجنگ ڈائریکٹر اور سی ای او بلدیو پرکاش نے کل یہاں کارپوریٹ ہیڈ کوارٹر میں سال 2022 کے لیے بینک کے ای کلینڈر – موبائل ایپلی کیشن کی نقاب کشائی کی ۔اس موقعہ پر ایگزیکٹو صدر سنیل گپتا، صدور، نائب صدور اور دیگر سینئر افسران موجود تھے جبکہ ملک بھر سے زونل سربراہان اور عملہ نے بھی ویڈیو کانفرنسنگ موڈ کے ذریعے نقاب کشائی کی تقریب میں شرکت کی۔بینک صارفین کو نئے سال کی مبارکباد دیتے ہوئے بلدیو پرکاش نے کہا کہ "جیسا کہ آپ سب جانتے ہیں، جے اینڈ کے بینک کے روایتی دیواری کلینڈر نے جموں و کشمیر کے لوگوں کے ساتھ بہت مضبوط جذباتی رابطہ قائم کیا ہے۔ تاہم مجھے یقین ہے کہ لوگ ہمارے ای کلینڈر کو بھی پسند کریں گے ۔ نئے سال کی قراردادوں کے حصے کے طور پر نامکمل تنظیمی اہداف کو پورا کرنے کے لیے عملے پر زور دیتے ہوئے انہوں نے کہا، "سال کے پہلے ہی دن، آئیے بینک کی آمدنی کے سلسلے کو بڑھانے کے لیے کوششیں کرتے ہوئے اپنی کسٹمر سروسز کو بہتر بنانے پر اپنی توجہ کو دوگنا کرنے کا عزم کریں۔اس موقع پر خطاب کرتے ہوئے سنیل گپتا نے کہا، "بنک کو پچھلے سال کووڈ19 اور اس کے بعد آنے والی مرکزی حکومت کے مشورے کی وجہ سے دیواری کلینڈر سے ڈیجیٹل کلینڈر میں تبدیل ہونا پڑا۔اس موقع پر ایک پاور پوائنٹ پریزنٹیشن بھی پیش کی گئی جس میں ایپ پر مبنی ای کلینڈر 2022 کے فیچرز اور فنکشنز کو دیکھا گیا۔