کور کمانڈر کا دیانت داری اور فرض شناسی کا پیغام
سرینگر//جموں و کشمیر لائٹ انفنٹری (جے اے کے ایل آئی)رجمنٹل سنٹر سرینگر میں ہفتہ کو ساتویں بیچ کے 538اگنی ویروں کی ’’اٹیسٹیشن کم پاسنگ آئوٹ پریڈ‘‘ فوجی روایات کے ساتھ منعقد ہوئی۔ 24ہفتوں پر مشتمل سخت اور جامع فوجی تربیت کامیابی سے مکمل کرنے کے بعد یہ نوجوان باضابطہ طور پر بھارتی فوج کی مختلف یونٹوں کا حصہ بن گئے۔پریڈ میں فوجی نظم و ضبط، پیشہ ورانہ مہارت اور عسکری روایات کا بھرپور مظاہرہ دیکھنے کو ملا۔ اس موقع پر وائٹ نائٹ کور کے جنرل آفیسر کمانڈنگ لیفٹیننٹ جنرل پی کے مشرا نے پریڈ کا معائنہ کیا اور پاسنگ آئوٹ ہونے والے اگنی ویروں، ان کے اہل خانہ اور فوجی افسران سے خطاب کیا۔لیفٹیننٹ جنرل مشرا نے تربیت مکمل کرنے والے نوجوانوں کو مبارکباد پیش کرتے ہوئے کہا کہ وہ اب جے اے کے ایل آئی رجمنٹ کے قابلِ فخر اور باوقار خاندان کا حصہ بن رہے ہیں۔ انہوں نے کہا کہ سخت تربیتی مراحل سے کامیابی کے ساتھ گزرنے کے بعد یہ نوجوان اب قومی دفاع کی عظیم ذمہ داری سنبھالنے کیلئے تیار ہیں۔انہوں نے کہا کہ جے اے کے ایل آئی رجمنٹ کی روایت صرف وطن کیلئے جان قربان کرنے تک محدود نہیں بلکہ قوم کی خدمت، عزت و وقار اور فرض شناسی پر مبنی زندگی گزارنے کا درس بھی دیتی ہے۔ ان کے مطابق فوجی زندگی نظم و ضبط، قربانی اور بے لوث خدمت کا نام ہے۔یو این ایس کے مطابق اپنے خطاب میں کور کمانڈر نے کہا، ”آپ خوش نصیب ہیں کہ ایسی فوج کا حصہ بن رہے ہیں جس کی بہادری، قربانی اور حب الوطنی کی تاریخ سنہری حروف میں لکھی گئی ہے۔ بھارتی فوج صرف سرحدوں کی محافظ نہیں بلکہ ملک کے عوام کیلئے اعتماد، تحفظ اور امید کی علامت بھی ہے۔”
انہوں نے کہا کہ بھارتی فوج نے مختلف جنگوں، انسدادِ دہشت گردی کارروائیوں، قدرتی آفات اور قومی بحرانوں کے دوران ہمیشہ مثالی کردار ادا کیا ہے اور ہر مشکل وقت میں عوام کیلئے امید اور سہارا ثابت ہوئی ہے۔نئے فوجیوں سے خطاب کرتے ہوئے لیفٹیننٹ جنرل مشرا نے کہا کہ آج سے وہ صرف فوجی وردی اور رینک ہی نہیں پہنیں گے بلکہ ملک کے کروڑوں شہریوں کی امیدوں، اعتماد اور توقعات کے امین بھی ہوں گے۔ انہوں نے اگنی ویروں پر زور دیا کہ وہ اپنی پیشہ ورانہ ذمہ داریوں کو پوری دیانت داری، لگن اور عزم کے ساتھ نبھائیں۔انہوں نے کہا کہ ان کی ہمت، ثابت قدمی اور محنت نہ صرف فوج کیلئے باعثِ فخر ہوگی بلکہ آنے والی نسلوں کیلئے بھی مشعلِ راہ بنے گی۔ انہوں نے اگنی ویروں کو تلقین کی کہ وہ بھارتی فوج کی عظیم روایات، نظم و ضبط، پیشہ ورانہ مہارت اور قومی خدمت کے جذبے کو ہمیشہ برقرار رکھیں۔کور کمانڈر نے اگنی ویروں کے والدین اور اہل خانہ کے کردار کو بھی سراہا اور کہا کہ ان نوجوانوں کی کامیابی میں ان کے خاندانوں کی قربانیوں اور حوصلہ افزائی کا اہم کردار ہے۔ انہوں نے والدین کا شکریہ ادا کرتے ہوئے کہا کہ انہوں نے اپنے بچوں کو ملک کی خدمت کیلئے فوج میں شامل ہونے کی ترغیب دے کر ایک قابلِ قدر قومی خدمت انجام دی ہے۔تقریب میں فوج کے سینئر افسران، اگنی ویروں کے والدین، رشتہ داروں اور معزز شخصیات نے شرکت کی۔ شرکا نے نوجوان سپاہیوں کی شاندار پریڈ، عسکری مہارت اور جذبہ حب الوطنی کو سراہتے ہوئے ان کیلئے نیک تمناں کا اظہار کیا۔پاسنگ آٹ پریڈ کے ساتھ ہی 538 اگنی ویر باضابطہ طور پر بھارتی فوج کا حصہ بن گئے اور اب وہ ملک کے مختلف علاقوں میں تعیناتی کے بعد قومی سلامتی اور دفاع کی ذمہ داریاں انجام دیں گے۔
