سرینگر// عوامی دلچسپی کے بعد محکمہ سیاحت نے جھیل ڈل میں روزانہ موسیقی کے فواروں کے3لیزر شو منعقد کرنے کا اعلان کیا۔محکمہ سیاحت کی طرف سے مقامی و غیر مقامی سیاحوں کیلئے جھیل ڈل میں ایس کے آئی سی سی کے عقب میں موسیقی سے لیس فواروں کی لیزر نمائش میں لوگوں کی غیر معمولی دلچسپی کو مد نظر رکھتے ہوئے ان میں توسیع کر کے روزانہ کی بنیادوں پر3شومنعقد کرانے کا فیصلہ لیا گیا۔ سیکریڑی سیاحت ریگزن سمپال کا کہنا تھا کہ مقامی لوگوں کی دلچسپی کو مد نظر رکھتے محکمہ نے یہ فیصلہ لیا کہ آئندہ ہفتے ہر روز شام7بجے کے بعد15منٹوں کیلئے وقفہ وقفہ سے3 بار لیزر شو منعقد کرائے جائیںگے۔انہوں نے کہا کہ لوگوں کی طرف سے بے تحاشا دلچسپی کے مظاہرے سے حوصلہ پاکر محکمہ نے ہفتے سے ہر رات شام سات بجے سے پندرہ منٹوں پر محیط تین مرحلوں میں شو چلانے کا فیصلہ لیا ہے۔انہوں نے کہا کہ اس سہولیت کا آغاز سٹی کے لوگوں کی زندگی میں تروتازگی پیدا کرنے اور مقامی لوگوں اور سیاحوں کو فرحت کا سامان فراہم کرنے کے لئے کیا گیا ہے۔لیزر شو کے لئے براستہ چشمہ شاہی گیٹ پندرہ دنوں کے لئے داخلہ مفت رکھا گیا ہے۔سمپفل نے کہا کہ شو سے زیادہ سے زیادہ تعداد میں لوگوں کے لطف اندوز ہونے کے لئے داخلہ مفت رکھا گیا ہے۔انہوں نے کہا کہ محکمہ سیاحت ریاست بھر میں تمام سیاحتی مقامات پر مناسب انفراسٹرکچر کو یقینی بنارہا ہے تاکہ سیاحوں اور مقامی لوگوں کو ان مقامات سے لطف اندوز ہوسکیں۔موصوف سکریٹری نے کہا کہ اس سہولیت سے ریاست میں سیاحتی سیکٹر کو مزید فروغ حاصل ہوگا اور اس سے جھیل ڈل کی خوبصورتی میں چار چاند لگ جائیں گے۔قابل ذکر ہے کہ چھ کروڑ روپیوں کی لاگت والے اس لیزر شو کو وزارت سیاحت نے وزیر اعظم کے سیاحت کو فروغ دینے کے ترقیاتی پروگرام سودیش درشن اسکیم کے تحت شروع کیا گیا ہے۔(یو این آئی)
جھیل ڈل میں موسقی فوارے
