بارہمولہ// جنگلی سبزی کی ایک قسم ’ کنہ پپر‘میں کافی حد تک اضافہ دیکھنے کو ملا ہے جس کی وجہ سے دیہی علاقوں خاصکر جنگلوں کے نزدیک رہنے والے لوگوں میں خوشی نظرآرہی ہے ۔ ضلع بارہمولہ کے کنڈی ، نارواو ،اوڑی، رفیع آباد ،پٹن اورٹنگمرگ کے علاوہ کئی علاقوں میںرہنے والے لوگوںکا کہنا ہے کہ اگر چہ اس مرتبہ موسم سرما کے دوران جنگلوں میں زیادہ برفباری نہیں ہوئی ہے تاہم جنگلوں میں پیدا ہونے والی سبزیوں میں پھر بھی اضافہ ہوا ہے جس سے نہ صرف یہ لوگ اپنے لئے سبزیاں جمع کررہے ہیں بلکہ کئی علاقوں میں لوگ اسے بازاروں میں فروخت بھی کررہے ہیں ۔مین چوک بارہمولہ میں رفیع آباد اور دیگر کئی دیہی علاقوں سے آنے والی درجنوں خواتین ایک خاص قسم کی جنگلی سبزی ’کنہ پپر‘ٹوکریوں میںرکھ کرفروخت کرتی ہوئی نظر آرہی ہیں اور اس سے اُنہیں کافی منافع بھی ہو رہا ہے ۔ شاہ بیگم نامی ایک خاتون نے بتایا کہ ’ کنہ پپر‘ میں امسال کافی اضافہ ہواہے اور وہ دیگر خواتین کے ساتھ جنگلوں سے جمع کرکے اب بازاروں میں بیچ رہی ہیں ۔انہوں نے کہا’’ ہمیں خوشی ہے کہ اس سال اس سبزی کی مقدار میں کافی حد تک اضافہ ہوا ہے‘‘ ۔انہوں نے بتایا کہ ان قدرتی سبزیوںسے خاصکر جنگلوں کے نزدیک رہنے والے لوگوں کوکافی حد تک فائدہ پہنچ رہا ہے ۔
جنگلی سبزی ’ کَنہءپَپر‘ کی پیداوا ر میں اضافہ | جنگلات کے نزدیک رہائش پذیر علاقوں میں خوشی
