جموں و سرینگر میٹرو ریل پروجیکٹوں میں اہم پیش رفت

جموں//ریاستی سرکار نے جموں اور سرینگر شہر میں ٹرانسپورٹ کے مسئلہ کو حل کرنے کے لئے میٹرو ریل پروجیکٹ کی تیاری میں سرعت لانے کا فیصلہ کیا ہے ۔چیف سیکرٹری بی وی آر سبھرامنیم کی صدارت میں منعقدہ میٹنگ کے دوران بتایا گیا کہ 
حکومت ڈی پی آر تیار کرنے کے لئے دلی میٹرو ریل کارپوریشن یا شری ای شری دھرن جیسے میٹروماہرین رابطہ کرے گی اور ڈی پی آر کی تیاری کے ساتھ ساتھ یہ سارا عمل اپریل 2019 ء تک مکمل کئے جانے کی ہدایت دی گئی ہے۔اس اعلیٰ سطحی میٹنگ کے دوران جموں اور سری نگر شہروں میں میٹرو پالیٹین ریجن ڈیولپمنٹ اتھارٹیوں کی شروعات اور اس کے لئے وقت کی حد مقرر کرنے کے لئے افسروں کے ساتھ تبادلہ خیال کیا۔اُنہوں نے دونوں شہروں میں ماس ریپڈ ٹرانز ٹ کارپوریشن پرائیویٹ لمٹیڈ کی شروعات کا بھی جائزہ لیا۔میٹنگ میں پرنسپل سیکرٹری مکانات و شہری ترقی ، پرنسپل سیکرٹری ٹرانسپورٹ ، صوبائی کمشنر جموں ، ٹرانسپورٹ کمشنر ، جموں اور سری نگر میٹرو پالیٹین اتھارٹیز کے چیف ایگزیکٹیو آفیسر اور میٹرو ریل ٹرانسپورٹ کارپوریشن کے اعلیٰ عہدہ داروں کے علاوہ دیگر کئی افسران بھی موجود تھے۔دونوں کارپوریشن کی رجسٹریشن کے لئے ایک ہفتے کی مدت مقرر کرتے ہوئے چیف سیکرٹری نے مکانات و شہری ترقی محکمہ کے افسروں کو عہدہ داروں پر مشتمل ایک گروپ تشکیل دینے کی ہدایت دی جو سری نگر اور جموں شہروں میں ماسٹر پلان کو مدنظر رکھتے ہوئے میٹرو کے لئے روٹ کا تعین کریں گے ۔چیف سیکرٹری نے مکانات و شہری ترقی محکمہ سے کہا کہ وہ فنڈنگ کے لئے بیرونی وسائل مثلاً جاپان انٹرنیشنل کارپوریشن ایجنسی کے ساتھ رابطہ کرنے کے امکانات کا جائزہ لیں۔