دیرپا ترقی اور روزگارکیلئے پالیسیاں بنانے کا عمل جاری :سنہا
سرینگر//لیفٹیننٹ گورنر منوج سنہا نے کل کشمیر ہیرٹیج گورنمنٹ آرٹس ایمپوریم سری نگر میں جموں و کشمیر ٹریڈ شو۔ 2024 ء کا اِفتتاح کیا۔ لیفٹیننٹ گورنر نے اَپنے خطاب میںکہاکہ جموں و کشمیر ٹریڈ شو اس بات کی عکاسی کرتا ہے کہ جموںوکشمیر یوٹی نے مواقع کے دور کا آغاز کیا ہے۔ یہ یوٹی ایک متحرک کاروبار اور تجارتی ماحولیاتی نظام بنانے اور عالمی مارکیٹ میں جموں و کشمیر کے منفرد ثقافتی اور فنکارانہ ورثے کو ایک نئی شناخت فراہم کرنے کے لئے ہمارے عزم کا اعادہ کرتا ہے۔لیفٹیننٹ گورنر نے وزیر اعظم نریندر مودی کی رہنمائی میں زراعت، ہینڈلوم اور دستکاری کے شعبوں میں اِصلاحات لانے کے لئے یو ٹی اِنتظامیہ کے اہم اقدامات پر روشنی ڈالی۔
اُنہوں نے کہاکہ ہم دیرپا ترقی اور روزگار کے مواقع پیدا کرنے کو یقینی بنانے کے لئے خطے کی ثقافت، ورثے، زرعی عمدگی کو مدنظر رکھتے ہوئے پالیسیاں بنا رہے ہیں اور ان کو عملا رہے ہیں۔اُنہوں نے کہا کہ مجھے یہ دیکھ کر خوشی ہوئی ہے کہ وَن ڈِسٹرکٹ وَن پروڈکٹ اِقتصادی مواقع کی حوصلہ افزائی کر رہا ہے۔لیفٹیننٹ گورنر نے وزیر اعظم کے حالیہ دورہ جموں و کشمیر کے بارے میں بات کرتے ہوئے کہا کہ وزیر اعظم نے بین الاقوامی یوگا ڈے اور نوجوانوں کو بااِختیار بنانا، جموں و کشمیر میں تبدیلی جیسے پروگراموں کی قیادت کی ہے جس سے جموں و کشمیر کی ترقی کے سفر کو ایک نئی رفتاردی ہے۔اِس سے قبل لیفٹیننٹ گورنر نے جموں و کشمیر اور دیگر علاقوں کے کاریگروں، بُنکروں، کاشتکاروں اور کاروباریوں کی طرف سے لگائے گئے سٹالوں کا دورہ کیاجس میں ہندوستان اور بیرون ملک کے خریداروں کے سامنے اَپنی مصنوعات کی نمائش کی گئی ۔
