جموں میں جنگجوﺅں کا نیٹ ورک

جموں//15اگست سے قبل جموں میں ایک خصوصی کارروائی عمل میںلاتے ہوئے جموں پولیس نے اس بات کا دعویٰ کیا ہے کہ انہوں نےجیش محمد کے نیٹ ورک کو پکڑ کر جنگجوﺅں کیساتھ کام کرنے والے 4نوجوانوں کو گرفتار کیا جن میں ایک اتر پردیش کا ہے۔جموں کے ایڈیشنل ڈائریکٹر جنرل آف پولیس مکیش سنگھ نے سماجی رابطہ ویب سائٹ پر ٹویٹ کرتے ہوئے انکشاف کیا کہ گرفتار شدہ چار عسکریت پسندوں کی گرفتاری سے ایک بڑے حادثے کو ٹال دیا گیا ۔انہوں نے کہاکہ گرفتار شدہ عسکریت پسندوں کو پاکستان میں مقیم جیش محمد کے عسکریت پسندوں نے ڈرون کے ذریعہ بھیجے جانے والے ہتھیاروں کو کشمیر تک پہنچانا تھا اور جموں میں یوم آزادی کے دن آئی ای ڈی دھماکہ کرنا تھا۔پولیس کے مطابق گرفتار شدگان کی شناخت منتظر منظور عرف سیف اللہ ولد منظور احمد بٹ ساکن پرچھو پلوامہ، اظہار خان عرف سونو خان ولد انتظار خان ساکن محلہ کندالا شاملی ا±تر پردیش،توصیف احمد شاہ عرف شوکت عرف عدنان ولد غلام محمد شاہ ساکن ہف شرمال ضلع شوپیان اور جہانگیر احمد بٹ ولد مشتاق احمد بٹ ساکن بنڈزو ضلع پلوامہ کے طور کی ہے۔پولیس کے مطابق سب سے پہلے منتظر کی گرفتاری عمل میں لاکراس کی تحویل سے ایک پستول،آٹھ گولیاں اور دو چینی گرینیڈ بر آمد کئے گئے۔پولیس کے مطابق منتظر کی ہی نشاندہی پر بعد میں باقی تین افراد کی گرفتاری عمل میں لائی گئی۔ منتظر پر الزام ہے کہ اسکی ٹرک اسلحہ ایک جگہ سے دوسری جگہ لیجانے کےلئے استعمال ہوتا تھا، جسے ضبط کیا گیا ہے۔