امرناتھ یاترا پر مشتمل گاڑیوں کو نکالنے کے بعد مسافر بردار گاڑیوں کو چلنے کی اجازت دی گئی
محمد تسکین
بانہال//جموں سرینگر قومی شاہراہ پر ٹریفک کی نقل و حرکت بغیر کسی خلل کے جاری رہی اور جموں کے بھگوتی نگر بیس کیمپ سے جمعرات کی علی الصبح دو الگ الگ گروپوں میں شری امرناتھ یاترا میں شامل 4885 یاتریوں کو 191 چھوٹی بڑی گاڑیوں کو پہلگام اور بال تل کی طرف نکالنے کے بعد جموں کے نگروٹہ سے صبح سات بجے سے دوپہر ایک بجے تک مسافر گاڑیوں کو وادی کشمیر کی طرف انے کی اجازت دی گئی تاہم یاترا گاڑیوں کو بانہال۔ قاضی گند فورلین ٹنل کے پار کرآنے کے بعد ہی دن کے ساڑھے گیارہ بجے سے دوپہر بعد دو بجے تک مسافر گاڑیوں کو جموں کی طرف آنے کی اجازت دی گئی۔اس دوران جمعرات کی صبح سے دھوپ اور چھاؤں کا سلسلہ شام تک جاری رہا اور دوپہر تین بجے بارشوں کی ہلکی بوندا باندی بھی ہوئی لیکن یہ سلسلہ مکمل بارشوں میں تبدیل نہ ہوسکا اور کچھ منٹوں کے بعد ہی مطلع مجموعی طور پر صاف ہوگیا۔ پچھلے دنوں کئی علاقوں میں ہلکی ہلکی بارشوں کی وجہ سے بانہال ، گول ، بٹوٹ اور کھڑی مہو۔منگت کے علاقوں میں پچھلے کئی روز سے گرمی کی شدت میں مجموعی طور پر کمی واقع ہوئی ہے اور لوگوں کو کسی حد تک گرمی سے راحت نصیب ہوئی ہے۔ شاہراہ پر ٹریفک کے حوالے سے بات کرنے پر ٹریفک پولیس حکام نے کشمیر عظمی کو بتایا کہ جموں سرینگر قومی شاہراہ پر ٹریفک کا سلسلہ شام تک جاری تھا اور جموں اور وادی کشمیر سے دوطرفہ مسافر ٹریفک کو نکالنے کے ساتھ ساتھ قاضی گنڈ سے ٹرکوں اور ایندھن کے خالی ٹینکروں کو جموں کی طرف جانے کی اجازت دی گئی۔ انہوں نے کہا کہ شاہراہ پر ڈھلواس ، مہاڑ ، پنتھیال ، رامسو ، کشتواڑی پتھر شیر بی بی اور قصبہ بانہال میں تنگ سڑک اور سڑک کی خراب سطح کے نتیجے میں ٹریفک کی آمدورفت سست روی کا شکار رہی تاہم سہ پہر بعد سے معمول کے ٹریفک کو شاہراہ پر بحال کیا گیا۔
