تھنہ منڈی کی مختلف پنچایتوں میں ’گائوں کی ائور ‘تقاریب منعقد

تھنہ منڈی //ریاستی انتظامیہ کی جانب سے چلائی جارہی ’بیک ٹو ولیج ‘پروگرام کے تحت تحصیل تھنہ منڈی کے مختلف علا قوںکی پنچایتوں میں پروگراموں کا اہتمام کیا گیا جن کے دوران آفیسران نے عوامی مسائل کا جائز ہ لیتے ہوئے ان کو قلمبند کیا ۔اس پروگرام کے تحت انتظامیہ کی جانب سے تعینات آفیسر ہائی سکول چلاس پہنچے جہاں پر سکولی طلباء اور سٹاف ممبران نے ان کا استقبال کیا ۔اس دوران تھنہ منڈی کی پنچائت راجدھانی ، پنچائت پنگائی اور پنچائت کریوٹ میںسرپنچوں اور پنچوں کی موجودگی میں آفیسران نے لوگوں کو درپیش مسائل کا جائزہ لیا ۔متعلقہ افیسر نے پنچائت راجدھانی میں چل رہے ترقیاتی کاموں کے علاوہ سرکاری اسکولوں اور محکمہ آئی سی ڈی ایس کے تحت چل رہے انگن واڈی مراکز کابھی دورہ کیا۔ متعلقہ افیسران نے کہا کہ ریاستی گورنر انتظامیہ کی طرف سے شروع پروگرام کے تحت لوگوں کے گھروںپر جاکر لوگوں کے مسائل کودیکھ کر قلمبند کیاجارہا ہے ۔تھنہ منڈی کی پنچائت راجدھانی کے سرپنچ عبدالغفور ڈار نے ریاستی گورنر ستیا پال ملک کی طرف سے اٹھائے قدم کی ستائش کرتے ہوئے کہا کہ ملک میں 80فیصد آبادی دیہا توں میں رہائش پذیر ہے جن کو متعدد مسائل کا سامنا ہے جبکہ انتظامیہ کی جانب سے عوامی مسائل کو حل کرنے کیلئے شروع کر دہ قدم قابل تعریف ہے ۔