عظمیٰ نیوز سروس
سرینگر//آئی جی پی کشمیر وی کے بردی نے پولیس کنٹرول روم کشمیر میں سالانہ جائزہ اجلاس کی صدارت کی۔ میٹنگ میں کشمیر زون کے تمام رینج ڈی آئی جیز، کشمیر زون کے تمام ڈسٹرکٹ ایس ایس پیز اور دیگر سینئر افسران نے شرکت کی۔ میٹنگ کے آغاز میں شریک افسران نے آئی جی پی کشمیر کو کشمیر زون میں جرائم کی مجموعی صورتحال سے آگاہ کیا اور جرائم کی روکتھام اور تفتیش کے معیار کو بہتر بنانے میں ان کی کوششوں پر روشنی ڈالی۔ جرائم کے علاوہ میٹنگ UAPAکے تحت آنے والے معاملات کی تحقیقات، UAPA کے معاملات میں جائیداد منسلک کرنے کی حیثیت، دہشت گردی سے متعلق اور دہشت گردی کی مالی معاونت کے معاملات،پبلک سیفٹی ایکٹ کے تحت حراست، این ڈی پی ایس/ نارکو دہشت گردی کے معاملات اور POCSO کے معاملات شامل رہے۔ اس کے علاوہ احتیاطی تدابیر کے تحت کی گئی کارروائی، زیر التوا تفتیشی کارروائی اور مفرور افراد کی گرفتاری پر بھی بات چیت ہوئی۔ ایس ایس پیز نے اپنے متعلقہ اضلاع کی تفصیلات سے آگاہ کیا، جن میں جرائم کی روکتھام کی کوششوں، ایف آئی آر اور ای ایف آئی آر کے اندراج، تفتیش کی صورتحال اور اپنے دائرہ اختیار میں مقدمات کو نمٹانے پر روشنی ڈالی۔آئی جی پی کشمیر نے جنرل کرائم انویسٹی گیشن کا جائزہ لیا اور جرائم کی روکتھام میں ضلعی سربراہان کی کوششوں کو سراہا۔ انہوں نے تحقیقات کے معیار کو مزید مستحکم کرنے کی ضرورت پر زور دیا اور بہتر تفتیشی طریقوں، سائنسی آلات کے زیادہ استعمال اور ایک مضبوط فالو اپ (پیروی) نظام کے ذریعے سزا کی شرح کو بہتر بنانے کی اہمیت پر زور دیا۔خاص طور پر منشیات اور دہشت گردی سے متعلق مقدمات میں۔ انہوں نے افسروں کو ہدایت دی کہ وہ NDPS اور UAPA کیسوں میں سزا کو یقینی بنانے کیلئے ایک مضبوط نظام وضع کریں تاکہ نارکو مجرمانہ اور دہشت گردی کے ماحولیاتی نظام کو توڑا جا سکے۔ اجلاس کے دوران انسدادی کارروائیوں اور زیر التوا انکوائری کارروائیوں کی صورتحال کا بھی جائزہ لیا گیا۔ انہوںنے تمام شریک افسران کو جرائم پر قابو پانے، تفتیش، پرازیکیوشن اور مقدمات کے بروقت نمٹانے سے متعلق اہم ایجنڈے کے نکات پر واضح ہدایات جاری کیں۔ ان ہدایات کا مقصد احتساب کو مضبوط بنانا، تفتیش کے معیار کو بہتر بنانا اور انصاف کی فوری فراہمی کو یقینی بنانا تھا۔آئی جی پی کشمیر نے ضلعی سربراہوں کو ہدایت دی کہ وہ تفتیشی افسروں کے لیے صلاحیت سازی کی باقاعدہ ورکشاپس منعقد کریں جس کا مقصد تفتیشی مہارت کو بڑھانا اور انفارمیشن ٹیکنالوجی کے موثر استعمال کے ذریعے قانونی ذہانت کو تقویت دینا ہے۔ انہوں نے ضلعی سربراہان پر زور دیا کہ وہ اپنے متعلقہ اضلاع میں وقتاً فوقتاً جرائم کے جائزہ اجلاسوں کی ذاتی طور پر نگرانی اور صدارت کرتے ہوئے فعال کردار ادا کریں۔
