یواین آئی
نئی دہلی// کانگریس کے سینئر لیڈر اور لوک سبھا میں اپوزیشن لیڈر راہل گاندھی کے ’’بھارت جوڑو یاترا ‘‘ کے دو برس مکمل ہونے پر قومی راجدھانی دہلی کے اوکھلا میں کل شام ایک شاندا ریلی کا اہتمام کیا گیا، جس میں کانگریس کے سینئر لیڈر سلمان خورشید ، کانگریس کے راجیہ سبھا رکن دگ وجے سنگھ، گجرات کے ممبر اسمبلی جگینش میوانی، سابق ممبر اسمبلی ڈاکٹر اشوت کپور سمیت کانگریس کے بہت سے قومی اور مقامی لیڈروں نے شرکت کی۔کانگریس کے سینئر لیڈر سلمان خورشید نے ریلی کو خطاب کرتے ہوئے کہا کہ تعلیم، روزگار ، بہتر اقتصادی حالت اور فرقہ وارانہ ہم آہنگی کے خوشگوار ماحول سے ہی ملک ترقی کرسکتا ہے۔ انہوں نے کہا کہ راہل گاندھی کی بھارت جوڑو یاترا نے ملک کو ایک نئی سمت دی ہے اور اس سے کانگریس کو ہمت اور حوصلہ ملا ہے۔ دگ وجے سنگھ نے کہا کہ راہل گاندھی کی بھارت جوڑو یاترا نے ملک کے عوام کو خوف سے باہر نکال کر پارٹی کو نیا جوش و خروش اور نئی توانائی دی ہے۔ بھارتیہ جنتا پارٹی (بی جے پی) پر حملہ کرتے ہوئے سنگھ نے الزام لگایا کہ بی جے پی کو جب جب انتخابات میں شکست کا سامنا ہوتا ہے، وہ ملک میں فرقہ وارانہ ماحول پیدا کرکے انتخابات جیتنے کی کوشش کرتی ہے۔ لیکن گاندھی کی اس یاترا نے محبت کا پیغام دیکر اس کے اس حربے کو ناکام بنادیا ہے۔کانگریس کی ابھرتی ہوئی لیڈر زیبا خان کی قیادت میں نکالی گئی اس ریلی میں مسٹر جگنیش میوانی نے کہا کہ راہل گاندھی کی بھارت جوڑو یاترا نے کنیاکماری سے کشمیر تک محبت کا پیغام دیکر ملک میں فرقہ ہم آہنگی کو مضبوط کیا ہے اور پارٹی کے اندار نیا جوش و خروش پیدا کیا ہے۔محترمہ زیبا خان نے کہا کہ ملک راہل گاندھی کو وزیراعظم کے عہدے پر دیکھنا چاہتا ہے، جس کے لئے پارٹی کا ہر کارکن اپنی بھرپور کوشش کر رہا ہے۔ریلی کے اہم شرکا میں کانگریس سیوادل کے صدر لال جی ڈیسائی ، پٹ پڑ گنج کانگریس کے ضلع صدر ایشور سنگھ باگڑی ، ذاکر نگر کے سابق کونسلر شعیب دانش ، شاہین باغ کی کونسلر عریبہ خان ، شکیل احمد خان، ڈاکٹر احتشام ، محمد رفیع اور فیروز خان شامل تھے۔ جبکہ گجرات ، تلنگانہ ، مہاراشٹر، مدھیہ پردیش، چھتیس گڑھ ، کیرالہ ، تملناڈو، پبجاب ، ہریانہ ، منی پور سمیت کئی دیگر ریاستوں سے آئے ہوئے پارٹی کارکنوں نے بھارت جوڑو یاترا کے اپنے خوشگوار اور پرجوش تجربات حاضرین سے شیئر کئے۔
