عظمیٰ نیوز سروس
سرینگر// محکمہ موسمیات نے 10 مئی کی دوپہر سے جموں و کشمیر میں تازہ مغربی ڈسٹربنس کی آمد کی پیش گوئی کرتے ہوئے کہا ہے کہ پورے خطے میں صرف محدود موسمی سرگرمیاں متوقع ہیں۔ ڈائریکٹر محکمہ موسمیات سرینگر مختار احمد نے کہا کہ کسان 9 مئی تک فیلڈ آپریشن جاری رکھ سکتے ہیں، کیونکہ موسمی حالات کافی حد تک مستحکم رہنے کا امکان ہے، اس عرصے کے دوران کوئی خاص بارش متوقع نہیں ہے۔ انہوں نے مزید کہا کہ آنے والے نظام سے 10، 11 اور 12 مئی کو جموں و کشمیر کے کچھ حصوں میں ہلکی بارش، تیز ہوائوں اور الگ تھلگ مقامات پرگرج چمک کی سرگرمیاں متوقع ہیں۔ تاہم، انہوں نے واضح کیا کہ کسی بڑی یا بڑے پیمانے پر بارش کی توقع نہیں ہے۔دریں اثنا، جموں کا خطہ زیادہ تر خشک رہنے کی توقع ہے، آنے والے دنوں میں دن کے درجہ حرارت میں بتدریج اضافہ ہونے کا امکان ہے۔ حکام نے کہا کہ یہ نظام مختصر اور مقامی طور پر موسم کی خرابی کا باعث بن سکتا ہے، لیکن انہوں نے اس بات کی تصدیق کی کہ اب تک موسم کی کوئی شدید وارننگ جاری نہیں کی گئی ہے۔
