بھارت کو مذاکرات کی میز پر آنا ہی پڑے گا:عبدالباسط

سرینگر//بھارت میں تعینات پاکستانی ہائی کمشنر عبدالباسط کا کہنا ہے کہ موجودہ صورتحال اور بھارت کی جانب سے پیش کردہ شرائط مذاکرات کیلئے سازگار نہیں، پاکستان بھارت کو جلد یابدیر مذاکرات کی میز پر آناہوگا۔ سی این ایس مانیٹر نگ ڈیسک کے مطابق نئی دہلی میں ایک انٹرویو کے دوران پاکستانی ہائی کمشنر کا کہنا تھا کہ پاکستان بھارت سے تمام تصفیہ طلب معاملات پر بامعنی مذاکرات چاہتا ہے اور آج نہیں تو5 سال بعد بھی بھارت کو مذاکرات کی میز پر آنا ہی پڑے گا۔ان کا کہنا تھا کہ پاکستان ایک ذمہ دار ملک ہے اور عارضی فوائد کے لئے قومی سلامتی کے امور پر سمجھوتا نہیں کرے گا۔عبد الباسط کا کہنا تھا کہ سزا یافتہ بھارتی جاسوس کلبھوشن یادو کے حوالے سے پاکستان کی پوزیشن مضبوط ہے اور عالمی عدالت میں اس کیس کے جانے سے واضح ہوگیا کہ پاکستان میں دہشت گردی بیرونی تعاون کے بغیر نہیں ہوسکتی جب کہ کلبھوشن کے خاندان کو ویزا اور قونصلر رسائی کا فیصلہ میرٹ پر ہوگا۔