ایجیک بھی بنک ملازمین کی حمایت میں

سرینگر //ایمپلائز جوائنٹ ایکشن کمیٹی کے سربراہ عبدالقیوم وانی نے کہاہے کہ جموں وکشمیر بنک کو پبلک سیکٹر ادارہ بنانے کافیصلہ نامناسب۔  انہوں نے کہاکہ ایجیک اس خودمختار اثاثے کی حفاظت اور فیصلہ واپس لینے کیلئے جموں وکشمیر بنک کے ملازمین کی ہڑتال کی مکمل حمایت کرے گا ۔ایمپلائز جوائنٹ ایکشن کمیٹی ایجیک کا ایک ہنگامی اجلاس صدر عبدالقیوم وانی کی سربراہی میں منعقد ہوا ۔اجلاس میں حکومت کے فیصلے جس میں جے کے بنک کوپبلک سیکٹر ادارہ بنانے کا اعلان کیا گیا،کے موضوع پر بحث کی گئی ۔ اجلاس میں موجود تمام لیڈران نے اس فیصلے پر تشویش کا اظہار کرتے ہوئے گورنر انتظامیہ سے مانگ کی کہ لوگوں کے مفاد کو مدنظر رکھتے ہوئے اس فیصلے کو واپس لیا جائے کیونکہ اس سے جموں وکشمیر بنک کی ترقی پر منفی اثرات مرتب ہوں گے۔اجلاس سے خطاب کرتے ہوئے عبداقیوم وانی نے کہا کہ ریاست میں پہلے سے ہی قائم پبلک سیکٹر اداے سیاسی اور باہمی مداخلت کی وجہ سے ابتدا سے ہی بدترین صورتحال کا سامنا کر رہے ہیں ۔انہوں نے کہا کہ ایسے ایک درجن کے قریب ادارے نہ صرف خستہ حال ہیں بلکہ بند ہونے کی دہلیز تک پہنچ گے ہیں جبکہ ان اداروں میں کام کر رہے ملازمین بھی سخت پریشانی اور فاقہ کشی کا شکار ہیں اور برسوں سے وہ تنخوائوں سے بھی محروم ہیں اور اب جموں وکشمیر بنک کو پبلک سیکٹر اداہ بنانے کی کوشش ہو رہی ہے جس سے یہ بنک تباہ ہو جائے گا ۔۔وانی نے کہا کہ ہمارے پبلک سیکٹر یونٹوں میں بیروزگار نوجوانوں کو روزگار کے مواقع فراہم کرنے اور لوگوں خدمت کرنے کے بڑی صلاحیت موجود ہے اور یہ تب ممکن ہے جب حکومت بہتر ہو گی ۔انہوں نے حکومت پر چوٹ کرتے ہوئے کہا کہ جموں وکشمیر بنک کو پبلک سیکٹر ادارہ بنانے سے پہلے اُن خستہ حال اور بیمار یونٹوں کو بحال کرنے کا فیصلہ لیا جانا چاہئے تھا ۔انہوں نے کہا کہ جموں وکشمیر بنک ریاست کے لوگوں کو اجتماعی اثاثہ ہے اور ریاست کے 5ہزار ملازمین بنک کے اہم اسٹیک ہولڈرزہیں لہذا ایجیک اس خودمختار ادارے کی حفاظت اورلوگوں کے مفاد کیلئے آل انڈیا جموں وکشمیر بنک کے آفیسران او ر ملازمین ایسوسی ایشن کی مدد کرنے کیلئے یہ اخلاقی زمہ داری محسوس کرتی ہے ۔انہوں نے کہا کہ جموں وکشمیر بنک کی ترقی اور خود مختار ی کو محفوظ رکھنا ہر سطح پر ضروری ہے ۔وانی نے ریاست کے گورنر ستیہ پال ملک ،مشیر بی بی ویاس ، خورشید احمد گنائی ، کے وجے کمار ، کے کے شرما ، کے علاوہ چیف سکریٹری بی وی آر سبھرمنیم ، پرنسپل سکریٹری خزانہ نوین چودھری سے اپیل کی ہے کہ وہ لوگوں اور بنک ملازمین کی خواہشات کے مطابق اس فیصلے پر ازسر نو دوبارہ غور کریں ۔انہوں نے جموں وکشمیر بنک کے چیئرمین سے بھی درخواست کی ہے کہ وہ بھی سرکار سے اپیل کریں کہ یہ فیصلہ واپس لیا جائے ۔اجلاس میں ایجیک لیڈر فیاض احمد شبنم ، خورشید احمد بٹ ، حاجی بشیر احمد ، شبیر احمد لنگو ، عبدالسلام راجپوری ، منظور احمد پانپوری ، سجاد احمد پرے ، فاروق احمد خان ، خالد محمود خان ، سید وجاہت دورانی ، نذیر احمد خان ، ملک فاروق ، میر نذیر ، ڈاکٹر منظور ،لطیف احمد ملک ، گنجش کھجوریہ ،محمد افضل بٹ ، محمد اکبر خان ، محمد رفیق راتھر م میر فیاض ، پیر نصیر احمد ، شبیر احمد بٹ کے علاوہ دیگر لیڈران بھی موجود تھے ۔