اوڑی میں لڑکی کی اغواکاری کے الزام میں پنجاب کے دوگرفتار

اوڑی//ظفر اقبال // اوڑی میں ایک لڑکی کا اغوا کرنے کے الزام میں پولیس نے دو غیر مقامی باشندوں کو گرفتار کیا ہے۔ایک پولیس افیسر نے بتایا کہ اوڑی سے تعلق رکھنے والی ایک لڑکی سماجی رابطہ سائٹوں کے ذریعہ غیر مقامی باشندوں کے رابطے میں آئی جنہوں نے مبینہ طور لڑکی کو نوکری کا فریب دیا تھا۔ملزمین نے لڑکی کے ساتھ رابطہ قائم کرنے کے بعد مبینہ طور اس کو اغوا کرنے کی کوشش کی تاہم پولیس کے مطابق اس واقعہ کی اطلاع موصول ہوتے ہی ملزمان کو اوڑی ٹاؤن میں گرفتار کر لیا گیا۔پولیس نے حراست میں لئے گئے افراد کی شناخت ہردیو سنگھ ولد جوگندر سنگھ اور گرجنت سنگھ ولد بیرا سنگھ  کے طور پر کی ہے۔ دونوں ریاست پنجاب کے گرداس پور سے تعلق رکھتے ہیں۔اس ضمن پولیس اسٹیشن اوڑی میں دفعہ 366 ، 109 آئی پی سی کے تحت ایف آئی آر درج کرکے مزید تفتیش شروع کردی گئی ہے۔ایس ڈی پی او اوڑی جنید ولی نے والدین سے اپیل کی  ہے کہ وہ اپنے بچوں کا خاص خیال رکھیں اور بچوں پر نظر رکھیں کی وہ موبائل کا صحیح استعمال کر رہے ہیں یا کسی غلط کام میں مبتلا ہو گئے ہیں۔انہوں نے بتایا کہ والدین کا  فرض ہے کہ وہ بچوں کوصحیح اور غلط کی پہچان بتائیں۔