محمد تسکین
بانہال// جموں سرینگر قومی شاہراہ پر منگل کی صبح ڈگڈول رام بن میں امرناتھ یاترا میں شامل ایک یاتری اسوقت زخمی ہوگیا جب وہ بس سے گر گیا۔ زخمی کو فوری طور پر وہاں یاترا ڈیوٹی پرتعینات پولیس اور دیگر فورسز کی مدد سے رام بن ضلع ہسپتال پہنچایا گیا جہاں اس کی حالت بہتر بتائی جارہی ہے ۔ پولیس نے بتایا کہ پہلگام کے راستے پوتر گھپا کی طرف جانے والی ایک یاترا بس میں سوار یاتری پولیس سٹیشن رام بن کے زیر حدود ڈگڈول کے نزدیک گاڑی سے گر کر زخمی ہوگیا اور اس کے سر میں چوٹیں ائیں۔ انہوں نے کہا کہ امرناتھ یاترا کی ڈیوٹی پر تعینات پولیس اہلکاروں نے زخمی کو فوری طور پر رام بن ہسپتال پہنچایا جہاں اس کا علاج و معالجہ چل رہا ہے اور وہ یہاں ہی زیر علاج ہیں۔ پولیس نے زخمی یاتری کی شناخت شانتی لعل ولد کملا شنکر سکنہ ریاست مدھیہ پردیش کے طور کی ہے۔ اس سلسلے میں بات کرنے پر میڈیکل سپرنا ٹینڈنٹ ضلع ہسپتال رام بن ڈاکٹر وریندر ترسل نے کشمیر عظمی کو بتایا کہ زخمی یاتری کو منگل کی صبح ضلع ہسپتال رام بن پہنچایا گیا اور زخمی کے سر میں چوٹیں آئی تھیں۔ انہوں نے کہا کہ ہسپتال پہنچنے پر زخمی کو ابتدائی طبی امداد فراہم کی گئی اور اس کا علاج و معالجہ شروع کیا گیا۔ انہوں نے کہا کہ بعد میں زخمی یاتری کے سر کا سی ٹی سکین کیا گیا اور زخمی کے دیگر ضروری ٹیسٹ کئے گئے۔ انہوں نے کہا کہ زخمی یاتری شانتی لعل ضلع ہسپتال رام بن میں ہی زیر علاج ہیں اور ان کی حالت مجموعی طور پر بہتر ہے۔ انہوں نے کہا کہ زخمی کو انتہائی نگہداشت اور نگرانی میں رکھا گیا ہے۔
