اسسٹنٹ انجینئر پانچ ہزار روپیہ کی رشوت لیتے ہوئے گرفتار: اے سی بی

سری نگر// جموں وکشمیر اینٹی کرپشن بیورو نے رولر ڈیلوپمنٹ ڈپارٹمنٹ بلاک پہلگام میں تعینات اسسٹنٹ انجینئر کو پانچ ہزار روپیہ کی رشوت لیتے ہوئے رنگے ہاتھوں دھر دبوچ کر سلاخوں کے پیچھے دھکیل دیا۔
 
اے سی بی کے ایک ترجمان نے بتایا کہ اینٹی کرپشن بیورو میں ایک شخص نے تحریری طورپر شکایت درج کی کہ رولر ڈیلوپمنٹ ڈپارٹمنٹ بلاک پہلگام میں تعینات اسسٹنٹ انجینئر شکیل احمد ڈار واجب الادا رقم کی واگزری کے لئے پانچ ہزار روپیہ کی رشوت طلب کر رہا ہے۔
 
انہوں نے بتایا کہ اینٹی کرپشن بیورو نے اس ضمن میں ایف آئی آر زیر نمبر 5/2022 کے تحت ایک کیس درج کرکے مزید تحقیقات شروع کی۔
 
انہوں نے کہا کہ اینٹی کرپشن بیورو نے ایک جال بچھایا جس دوران راشی اسسٹنٹ انجینئر کو سائل سے پانچ ہزار روپیہ کی رشوت لیتے ہوئے رنگے ہاتھوں گرفتارکیا گیا۔
 
اُن کے مطابق آزاد گواہوں کی موجودگی میں راشی انجینئر کے قبضے سے رشوت کی رقم ضبط کی گئی ۔
 
اس سلسلے میں مزید تحقیقات جاری ہے۔